22 May,2022

နေပြည်တော် မေ ၂၁

ဧရာဝတီတိုင်းဒေသကြီး၊ ကျိုက်လတ်မြို့နယ်၊ အိမ်ယာကြီးကျေးရွာ၌ မဟာဓါတ်အားလိုင်း ပြင်ပ အမျိုးသားလျှပ်စစ် ဓါတ်အားရရှိရေးစီမံကိန်းဖြင့် ဆောင်ရွက်ခဲ့သည့်  ဆိုလာအသေးစား ဓါတ်အားပေးစနစ် မီးလင်းရေးလုပ်ငန်းဖွင့်ပွဲအခမ်းအနားကို ယနေ့ နံနက်ပိုင်းက အဆိုပါ ကျေးရွာ၌ ကျင်းပပြုလုပ်ရာ သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးလှမိုး၊ ဧရာဝတီ တိုင်းဒေသကြီး အစိုးရအဖွဲ့ ဝန်ကြီးချုပ် ဦးတင်မောင်ဝင်းနှင့် သက်ဆိုင်ရာ တာဝန်ရှိသူများ တက်ရောက်ခဲ့ကြကြောင်း သိရသည်။

အခမ်းအနားတွင် ပြည်ထောင်စုဝန်ကြီး ဦးလှမိုးက ကျေးလက်နေပြည်သူများရဲ့ လူမှုစီးပွား ဘဝဖွံ့ဖြိုးတိုးတက်ရေး၊ ဘက်စုံကဏ္ဍစုံဖွံ့ဖြိုးရေးဟာ လျှပ်စစ်မီးရရှိမှုအပေါ်မှာ မူတည်နေတာ ဖြစ်တဲ့အတွက် နိုင်ငံတော် အစိုးရအနေနဲ့ ၂၀၃၀ ခုနှစ်တွင် တစ်နိုင်ငံလုံး လျှပ်စစ်ဓာတ်အား ရရှိရေးအတွက် အမျိုးသားလျှပ်စစ်ဓာတ်အားရရှိရေး စီမံကိန်း(NEP)ကို ရေးဆွဲခဲ့ပြီး ၂၀၁၆-၂၀၁၇ ဘဏ္ဍာရေးနှစ်မှစတင်၍ အကောင်အထည်ဖော် ဆောင်ရွက်ခဲ့ပါကြောင်း၊ မိမိတို့ဝန်ကြီးဌာန အနေဖြင့်လည်း မြို့ပြနှင့် ကျေးလက်ဖွံ့ဖြိုးမှုကွာဟချက်ကျဉ်းမြောင်းစေရေးမှာ အခြေခံအကျဆုံး လိုအပ်ချက်ဖြစ်တဲ့ လျှပ်စစ်မီးလင်းရေးကို ဖြည့်ဆည်းပေးနိုင်ရန်အတွက် ပြန်လည်ပြည့်ဖြိုးမြဲ စွမ်းအင်အရင်းအမြစ်များကို အသုံးပြုပြီးမဟာဓာတ်အားလိုင်း ပြင်ပလျှပ်စစ်မီးလင်းရေးလုပ်ငန်း များကို ကာလတို၊ ကာလရှည် စီမံချက်များ ရေးဆွဲအကောင်အထည်ဖော် ဆောင်ရွက်လျက်ရှိပါ ကြောင်း၊ လျှပ်စစ်စွမ်းအင်ကဏ္ဍ ဖွံ့ဖြိုးတိုးတက်ခြင်းဟာ လူနေမှုအဆင့် အတန်းကို မြင့်မား တိုးတက်စေရုံသာမက ပညာရေး၊ ကျန်းမာရေးကဏ္ဍတို့ကို ထောက်ပံ့ပေးနိုင်ပြီး အသေးစား ကုန်ထုတ်လုပ်ငန်းများ လုပ်ကိုင်နိုင်သည့် အခွင့်အလမ်းများပါ တစ်ပါတည်း ရရှိလာစေမှာ ဖြစ်ပါကြောင်း၊ ကျေးလက်ဒေသမီးရရှိရေးအနေဖြင့် လက်ရှိမှာ မဟာဓာတ်အားလိုင်းပြင်ပဧရိယာရဲ့ ၃၅ ဒသမ ၂ ရာခိုင်နှုန်း လွှမ်းခြုံပေးနိုင်ခဲ့ပါကြောင်း၊ အိမ်ယာကြီးကျေးရွာတွင် ဆောင်ရွက်သည့် ဆိုလာ ၁၁၅ ကီလိုဝပ်နှင့် ၁၁၀ ကီလိုဝပ် အရံဒီဇယ် အင်ဂျင်စနစ်ပါဝင်သော ဆိုလာ-ဒီဇယ် ပေါင်းစပ်စနစ် အမျိုးအစားကို ZLT Super Electrical ကုမ္ပဏီမှ တာဝန်ယူ တည်ဆောက်ခဲ့ပြီး နိုင်ငံတော်ဘတ်ဂျက်မှ ၆၀ ရာခိုင်နှုန်း ကျေးရွာနေ ပြည်သူများမှ ၂၀ ရာခိုင်နှုန်းနဲ့ လုပ်ငန်း ဆောင်ရွက်သည့်ကုမ္ပဏီမှ ၂၀ ရာခိုင်နှုန်း ထည့်ဝင်ဆောင်ရွက်ခဲ့ပါကြောင်း၊ စီမံကိန်းမှ ကျေးရွာရှိ အိမ်ထောင်စုပေါင်း ၂၉၀ ကျော် အကျိုးခံစားခွင့် ရရှိကြောင်း၊ ယခုလို လျှစ်စစ်မီးလင်းရေး‌စီမံကိန်း အောင်မြင်အောင် ဆောင်ရွက်နိုင်ရေး ဝိုင်းဝန်းပူးပေါင်း ဆောင်ရွက်ခဲ့ကြတဲ့ ဧရာဝတီတိုင်းဒေသကြီး အစိုးရအဖွဲ့နဲ့ သက်ဆိုင်ရာဌာနမှ တာဝန်ရှိသူများ၊ ကျေးလက်ဦးစီးဌာနမှ တာဝန်ရှိသူများ၊ ZLT Super Electrical ကုမ္ပဏီနှင့် ကျေးရွာသူ၊ ကျေးရွာသားများကို အသိအမှတ်ပြု ကျေးဇူးတင်ရှိ ပါကြောင်း၊ မိမိတို့ ဝန်ကြီးဌာန အနေဖြင့်လည်း ကျေးလက်နေပြည်သူများ၏ လူနေမှုအဆင့်အတန်း မြင့်မားရေးနဲ့ စီးပွားရေး ဖွံ့ဖြိုးတိုးတက် စေရေးအတွက် ကျေးလက်မီးလင်းရေး လုပ်ငန်းများ အပါအဝင်သမဝါယမ ကဏ္ဍဖွံ့ဖြိုးရေး၊ အသေးစားစက်မှုလက်မှုလုပ်ငန်းဖွံ့ဖြိုးရေး၊ ကျေးလက်ဒေသ ဘက်စုံဖွံ့ဖြိုး တိုးတက်ရေးလုပ်ငန်းများကို သက်ဆိုင်သူအားလုံးနဲ့ ပူးပေါင်းဆောင်ရွက်သွားမည် ဖြစ်ကြောင်း ပြောကြားပါသည်။

ဆက်လက်၍ ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်းက ဧရာဝတီ တိုင်းဒေသကြီးအတွင်း မဟာဓာတ်အားလိုင်းမရောက်နိုင်သော ကျေးရွာများရဲ့ Solar Mini Grid မီးလင်းရေးလုပ်ငန်းတွေကို ဆောင်ရွက်လျက်ရှိရာ ယနေ့အထိ စီမံကိန်း (၂၈)ခုအနက် အိမ်ယာကြီး ကျေးရွာအပါအဝင် စီမံကိန်းလုပ်ငန်း (၁၉)ခု ဆောင်ရွက်ပြီးစီးနေပြီဖြစ်ကြောင်း၊ ယခုလက်ရှိ Solar Mini Grid မီးလင်းရေးနဲ့ ဆောင်ရွက်ဆဲလုပ်ငန်း (၉)ခုရှိပြီး  အဆိုပါ စီမံကိန်းများမှ ကျေးရွာပေါင်း (၁၇)ရွာ  အိမ်ခြေ(၂၄၀၀)ကျော်ရှိ ပြည်သူများအနေဖြင့် မကြာမီကာလအတွင်း လျှပ်စစ်မီးရရှိသုံးစွဲ နိုင်တော့မှာဖြစ်ပါကြောင်း၊ ဧရာ၀တီတိုင်းဒေသကြီး ဖွံ့ဖြိုးရေးအတွက် ကုန်ထုတ်လမ်း၊ ရေပေးရေး တို့ကိုလည်း ပြည်ထောင်စုရန်ပုံငွေနဲ့တကွ တိုင်းဒေသကြီးရန်ပုံငွေများတွင်ပါ လျာထားဆောင်ရွက် လျက်ရှိပါကြောင်း၊ အခုမီးလင်းရေးစနစ် ရေရှည်တည်တံ့ အောင်မြင်စေရေးနှင့် လူမှုစီးပွားဘဝ တိုးတက် မြင့်မားရေးကို ကျယ်ကျယ်ပြန့်ပြန့် အထောက်အကူပြုနိုင်တဲ့ စီးပွားရေးလုပ်ငန်းများကို ပိုမိုလုပ်ဆောင်နိုင်ရေး ဆက်လက်ကြိုးစား အားထုတ်ကြစေလိုပါကြောင်း ပြောကြားပါသည်။

ဆက်လက်၍ ကျေးလက်ဒေသဖွံ့ဖြိုးတိုးတက်ရေးဦးစီးဌာန ညွှန်ကြားရေးမှူးချုပ် ဦးသိန်းလွင်က ကျေးလက်နေပြည်သူများ မီးရရှိရေးအတွက် ၂၀၁၆−၂၀၁၇ ဘဏ္ဍာရေးနှစ်မှ ၂၀၂၀-၂၀၂၁ ဘဏ္ဍာရေးနှစ်အထိ ၅ နှစ်တာကာလအတွင်း အိမ်သုံးဆိုလာစနစ်နဲ့ ကျေးရွာပေါင်း ၉၀၀၀ ကျော်၊ အိမ်ထောင်စုပေါင်း ၄ သိန်းကျော်၊ အသေးစား ဓာတ်အားစနစ်နဲ့ စီမံကိန်း လုပ်ငန်းပေါင်း ၁၂၁ခု၊ ကျေးရွာပေါင်း ၁၅၄ ရွာ၊ အိမ်ထောင်စုပေါင်း ၃၇,၀၀၀ ကျော်၊ စာသင်ကျောင်း ၆,၀၀၀ ကျော်၊ ဆေးပေးခန်း ၁,၆၀၀ ကျော်၊ ဘာသာရေး အဆောက်အဦပေါင်း ၈,၀၀၀ ကျော်နှင့် အသေးစား စက်မှုလက်မှုလုပ်ငန်းပေါင်း ၁,၃၀၀ ကျော် လျှပ်စစ်မီးရရှိရေးအတွက် ဆောင်ရွက်ပေးနိုင်ခဲ့ပြီး လမ်းမီးတိုင်ပေါင်း ၅၃,၀၀၀ကျော် ဆောင်ရွက်ပေးနိုင်ခဲ့ပါကြောင်း၊  ကျေးလက်မီးလင်းရေးလုပ်ငန်း များကို ဆောင်ရွက်ရာ၌ မိမိတို့အနေဖြင့် ပြည်သူ - ပုဂ္ဂလိက ပူးပေါင်းပါဝင်မှု အင်အားကို ရယူပြီး အစွမ်းကုန်ကြိုးပမ်း အကောင်အထည်ဖော် ဆောင်ရွက်လျက်ရှိပါကြောင်း ရှင်းလင်းတင်ပြပါသည်။

ဆက်လက်၍  ဆိုလာအသေးစားဓါတ်အားပေးစနစ် မီးလင်းရေးလုပ်ငန်းဖွင့်ပွဲအခမ်းအနားကို သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီး ဦးလှမိုး၊ ဧရာဝတီတိုင်းဒေသ ကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်း၊ တိုင်းဒေသကြီးလမ်းပန်းဆက်သွယ်ရေးဝန်ကြီး ရဲမှူးကြီး တင်ဇော်ထွန်း၊ သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန အမြဲတမ်းအတွင်းဝန် ဦးခန့်ဇော်၊ ZLT Super Electrical ကုမ္ပဏီမှ တာဝန်ရှိသူတို့က ဖဲကြိုးဖြတ် ဖွင့်လှစ်ပေးပါသည်။

 ထို့နောက် မီးလင်းရေးစက်ရုံ ကဗ္ပည်းမော်ကွန်းအား သမဝါယမနှင့်ကျေးလက်ဖွံ့ဖြိုးရေး ဝန်ကြီးဌာန ပြည်ထောင်စုဝန်ကြီး ဦးလှမိုး၊ ဧရာဝတီတိုင်းဒေသကြီးအစိုးရအဖွဲ့ ဝန်ကြီးချုပ် ဦးတင်မောင်ဝင်းတို့က စက်ခလုပ်နှိပ်ဖွင့်လှစ်ကာ အမွှေးနံ့သာရေများ ပက်ဖျန်းပေးပြီး ဆိုလာ အသေးစားဓါတ်အားပေးစက်ရုံနှင့် ကျေးရွာတွင်း လျှပ်စစ်ဓါတ်အားသွယ်တန်းထားမှု အခြေအနေ များ ကြည့်ရှုစစ်ဆေးကြပြီး မအူပင်မြို့ မြို့နယ်သမဝါယမဦးစီးဌာနရုံး၌ သမဝါယမဦးစီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန၊ အသေးစားစက်မှုလက်မှုလုပ်ငန်းဦးစီးဌာန  (၃)ခုရှိ ခရိုင်နှင့် မြို့နယ် ဝန်ထမ်းများနှင့် ဆွေ့ဆုံကာ လိုအပ်သည်များ ဖြည့်ဆည်းဆောင်ရွက်ပေးပါသည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် ပုသိမ်မြို့ရှိ သမဝါယမသင်တန်းကျောင်းသို့ ရောက်ရှိကြည့်ရှုစစ်ဆေးရာ တာဝန်ရှိသူများမှ ဇွန်လတွင် သမဝါယစာရင်းရေးစာရင်းကိုင်  သက်မွေးပညာသင်တန်း ဖွင့်လှစ်ရန်စီစဉ်ထားရှိမှု အခြေအနေများကို တင်ပြရာ ပြည်ထောင်စု ဝန်ကြီးက အကြောင်းအမျိုးမျိုးကြောင့် အခြေခံပညာ အဌမတန်းအောင်မြင်ပြီး ပညာဆက်လက် သင်ကြားရန် အခက်အခဲရှိသူများကို သမဝါယမစာရင်းရေးစာရင်းကိုင်  သက်မွေးပညာသင်တန်း (၂)နှစ်တက်ရောက်ပြီးပါက အသိအမှတ်ပြု လက်မှတ်ရရှိမှာဖြစ်ကြောင်း၊ ပြင်ပတွင် အလုပ်အကိုင် အခွင့်အလမ်းများ ပေးနိုင်မှာဖြစ်ကြောင်း၊ သမဝါယမဒီဂရီကောလိပ်သို့လည်း ပေါင်းကူးဆက်လက် တက်ရောက်နိုင်မှာဖြစ်ပြီး (၂)နှစ် တက်ရောက်ပြီးပါက ဒီပလိုမာလက်မှတ်ရရှိမှာဖြစ်ကြောင်း၊ သင်တန်းကျောင်းမှ ကျောင်းသားကျောင်းသူများ ပိုမိုမွေးထုတ် ပေးနိုင်ရေး ကြိုးစား ဆောင်ရွက်ရန် နှင့် ကျောင်းဆင်းပါက အလုပ်အကိုင် အခွင့်အလမ်းများရရှိရေး ဌာနဆိုင်ရာများ၊ ပုဂ္ဂလိက လုပ်ငန်းရှင်များနှင့် ချိတ်ဆက် ပေးရန်နှင့် လိုအပ်သည်များ ကူညီပံ့ပိုး ပေးရန် ဆွေးနွေးမှာကြားပြီး သင်တန်းကျောင်းအား လှည့်လည်ကြည့်ရှုကာ လိုအပ်သည်များ ဖြည့်ဆည်းဆောင်ရွက်ပေးပါ သည်။

ဆက်လက်၍ ပြည်ထောင်စုဝန်ကြီးနှင့်အဖွဲ့သည် ကန်ကြီးထောင့်မြို့နယ် ပြည်စုံစိုက်ပျိုးရေး နှင့် အထွေထွေလုပ်ငန်း သမဝါယမအသင်းလီမိတက်သို့ Daedong လယ်ယာသုံး စက်ကိရိယာနှင့် စိုက်ပျိုးရေးသွင်းအားစု အရင်းမပျောက်မတည်ငွေပေးအပ်ပွဲ အခမ်းအနားသို့ ပြည်ထောင်စုဝန်ကြီး တက်ရောက်အမှာစကားပြောကြား ငွေကျပ် ၁၇၀ ဒသမ ၉၇၃ သိန်းတန်ဖိုးရှိ Daedong  DS-4510 ထွန်စက်တစ်စီး၊ စိုက်ပျိုးရေးသွင်းအားစု အရင်းမပျောက်မတည်ငွေကျပ် (၃၆)သိန်းတို့အား  ကန်ကြီးထောင့်မြို့နယ် ပြည်စုံစိုက်ပျိုးရေးနှင့် အထွေထွေလုပ်ငန်း သမဝါယမအသင်းလီမိတက် ဥက္ကဋ္ဌထံသို့လည်းကောင်း၊ ဆက်လက်၍ ကန်ကြီးထောင့်မြို့နယ် အနောက်စုကျေးရွာ အခြေခံပညာ အထက်တန်းကျောင်းခွဲ၌ ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ  တစ်နေ့လျှင်  ဂါလန် ၂၀၀ သန့်စင်ပေးနိုင်သော ရေသန့်စက် တပ်ဆင်ပြီးစီးမှုအားလည်းကောင်း၊ အနောင်စုကျေးရွာ Daedong ထွန်စက်ဖြင့် ထွန်ယက်နေမှု သရုပ်ပြပွဲအားလည်းကောင်း၊ အသေးစားစက်မှုလက်မှုလုပ်ငန်း ဦးစီးဌာနမှ ကြီးမှူးဖွင့်လှစ်လျက်ရှိသည့် လူသုံးကုန် လက်မှုထည်များဖြစ်သည့် ပလပ်စတစ်ခြင်း အမျိုးမျိုးနှင့် လက်ကိုင်အိတ်အမျိုးမျိုး ပြုလုပ်နည်းသင်တန်းမှ သင်တန်းသားသင်တန်းသူများ၏ ထုတ်ကုန်များအားလည်းကောင်း ကြည့်ရှုအားပေးပြီး လိုအပ်သည်များ ဖြည့်စွက်မှာကြားခဲ့ကြောင်း သတင်းရရှိပါသည်။