22 Mar,2025

ရေဖြူမြို့နယ် မာယံကျေးရွာ၌ စိမ့်စမ်းရေပိုက်လိုင်းသွယ်တန်းခြင်းလုပ်ငန်းဆောင်ရွက်နိုင်ရေး ကွင်းဆင်းစစ်ဆေး

*****************************

ရေဖြူ        မတ်        ၂၂

တနင်္သာရီတိုင်းဒေသကြီး၊ ထားဝယ်ခရိုင်၊ ရေဖြူမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီး ဌာနက စဉ်ဆက်မပြတ်ဖွံ့ဖြိုးမှုပန်းတိုင်(၆)နှင့်အညီ ကျေးလက်နေပြည်သူများ သန့်ရှင်းသော သောက်သုံးရေရရှိရေးအတွက် မာယံကျေးရွာ၌ စိမ့်စမ်းရေပိုက်လိုင်းသွယ်တန်းခြင်းလုပ်ငန်း ဆောင်ရွက်နိုင်ရေးအတွက် တာဝန်ရှိသူများက ယနေ့နံနက်ပိုင်းက ကွင်းဆင်းစစ်ဆေးခဲ့ကြောင်း သိရသည်။

ထိုသို့ကွင်းဆင်းစစ်ဆေးရာတွင် ရေဖြူမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန ဦးစီးအရာရှိ ဦးမြင့်ဦးအောင်နှင့် တာဝန်ရှိသူများသည် မာယံကျေးရွာရှိ ကျေးသူကျေးရွာသားများ သောက်သုံးရေဖူလုံစွာရရှိရေးအတွက် စိမ့်စမ်းရေပိုက်လိုင်းအရှည် ၃ မိုင် သွယ်တန်းခြင်းလုပ်ငန်း ဆောင်ရွက်ပေးနိုင်ရေးအတွက် ရေအရင်းအမြစ်ရရှိနိုင်မှုအခြေအနေများ၊ ရေသွယ်ယူမည့် လမ်းကြောင်းနှင့် ကျေးရွာ၏ လက်ရှိရေသုံးစွဲမှုအခြေအနေများကို ကြည့်ရှုစစ်ဆေးပြီး ဦးစီးအရာရှိက ကျေးရွာတာဝန်ရှိသူများနှင့် တွေ့ဆုံ၍ လိုအပ်သည်များ ပေါင်းစပ်ညှိနှိုင်းဆောင်ရွက်ခဲ့ကြောင်း သိရသည်။

အဆိုပါ ကျေးရွာ၌ စိမ့်စမ်းရေပိုက်လိုင်းသွယ်တန်းခြင်းလုပ်ငန်းကို ၂၀၂၅-၂၀၂၆ခု ဘဏ္ဍားရေးနှစ်တွင် ရန်ပုံငွေကျပ် ၇၃ ဒသမ ၈ သန်းဖြင့် လျာထားဆောင်ရွက်သွားမည်ဖြစ်ပြီး လုပ်ငန်းဆောင်ရွက် ပြီးစီးပါက အဆိုပါကျေးရွာနေပြည်သူများနှင့် ကျွဲ နွား တိရစ္ဆာန်များအတွက် သန့်ရှင်း သော သောက်သုံးရေလုံလောက်စွာရရှိမည်ဖြစ်၍ နွေရာသီကာလများတွင် ရေရှားပါးသည့် အခက်အခဲများကို ကုစားနိုင်မည်ဖြစ်ကြောင်း ရေဖြူမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီး ဌာနမှ သိရသည်။