13 May,2025

မကွေး မေ ၁၃

မကွေးတိုင်းဒေသကြီး၊ ပွင့်ဖြူမြို့နယ်၊ ဖူးပွင့်မျိုးသန့်စိုက်ပျိုးရေးနှင့်အထွေထွေလုပ်ငန်း သမဝါယမအသင်းလီမိတက်က ကျေးလက်နေတောင်သူများအား မျိုးကောင်းမျိုးသန့်စပါးများ စိုက်ပျိုးလာခြင်းကြောင့် အကျိုးအမြတ်ပိုမိုရရှိစေရန်၊ မျိုးကောင်းမျိုးသန့်များ တစ်ပိုင်တစ်နိုင် ဖြည့်ဆည်းပေးရန် ရည်ရွယ်၍ လုပ်ငန်းများ အကောင်အထည်ဖော်ဆောင်ရွက်လျက်ရှိသည်။

ပွင့်ဖြူမြို့နယ်၊ မင်းဘူး(စကု)မြို့နယ်များ၌ စပါးများ စိုက်ပျိုးထုတ်လုပ်နိုင်ရေးသမဝါယမ ကဏ္ဍက ဆောင်ရွက်လျက်ရှိရာ ဖူးပွင့်မျိုးသန့်စိုက်ပျိုးရေးနှင့်အထွေထွေလုပ်ငန်းသမဝါယမအသင်း လီမိတက်အနေဖြင့် နွေစပါးစိုက်ဧက ၅၀ ပေါ်တွင် ဆာဖိုးသာစပါးများကို ပျိုးထောင်ရက်နှင့် ကောက်စိုက်များသတ်မှတ်ကာ ၆ တန်း ၁ တန်းလှပ်(မျိုးစေ့ထုတ်)ကောက်စိုက်စနစ်ဖြင့် စိုက်ပျိုးခဲ့ သည်။ အဆိုပါ ဆာဖိုးသာစပါးများ စိုက်ပျိုးရာတွင်  CP ၊ ယူရီးယား၊ စိမ်းစိုနှင့် ပိုတက် စသည့် သွင်းအားစုမြေဩဇာများကို ထည့်သွင်းအသုံးပြုစိုက်ပျိုးထားရှိပြီး လာမည့်ဇူလိုင်လကုန်ပိုင်းတွင် ရိတ်သိမ်းသွားမည်ဖြစ်ကြောင်း သိရသည်။