04 Jun,2025

ကျောက်ဆည်၊ ဇွန် ၃

          သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ကျောက်ဆည်ခရိုင်အသေးစားစက်မှုလက်မှု လုပ်ငန်းဦးစီးဌာန အနေဖြင့် ၂၀၂၅-၂၀၂၆ ခု ဘဏ္ဍာရေးနှစ် အတွင်း အကောင်အထည်ဖော် ဆောင်ရွက်လျက်ရှိသည့် အသေးစားကုန်ထုတ်လုပ်ငန်းများ ဖန်တီးပေးနိုင်ရေးနှင့် ကျေးလက်နေ မိသားစုဝင်ငွေတိုးရေး စီမံကိန်းလုပ်ငန်းဖြင့် ဆောင်ရွက်မည့် စက်ချုပ်နည်းပညာသင်တန်းကို ယနေ့ နံနက်ပိုင်းက ကျောက်ဆည်မြို့နယ်၊ မယ်ဇယ်ပင်ကျေးရွာ၌ ကျင်းပသည်။

          အခမ်းအနားသို့ မန္တလေးတိုင်းဒေသကြီးအသေးစားစက်မှုလက်မှုလုပ်ငန်းဦးစီးဌာန တိုင်း ဒေသကြီးဦးစီးမှူးနှင့် တာဝန်ရှိသူများ၊ ကျောက်ဆည်ခရိုင်စီမံအုပ်ချုပ်ရေးအဖွဲ့မှ တာဝန်ရှိသူများ၊ ကျောက်ဆည်ခရိုင်အသေးစားစက်မှုလက်မှုလုပ်ငန်းဦးစီးဌာန ခရိုင်ဦးစီးမှူး၊ စီမံကိန်းကော်မတီဝင် များ၊ ရပ်မိရပ်ဖများ၊ သင်တန်းနည်းပြများနှင့် သင်တန်းသားများ တက်ရောက်ကြပါသည်။

          ဦးစွာ မန္တလေးတိုင်းဒေသကြီးအသေးစားစက်မှုလက်မှုလုပ်ငန်းဦးစီးဌာန တိုင်းဒေသကြီး ဦးစီးမှူးက ဌာန၏ လုပ်ငန်းဆောင်ရွက်ချက်များ၊ စီမံကိန်းလုပ်ငန်း ဆောင်ရွက်နိုင်မှုအခြေအနေများ၊ ရည်ရွယ်ချက်များနှင့် အကျိုး‌‌ကျေးဇူးများ၊ လုပ်ငန်းထူထောင်နိုင်ရန် လုပ်ငန်းသုံးပစ္စည်းများ ပေးအပ် မည့် အစီအစဉ်များအား ရှင်းလင်းပြောကြားသည်။ ထို့နောက် ကျောက်ဆည်ခရိုင် စီမံအုပ်ချုပ် ရေးအဖွဲ့မှ တာဝန်ရှိသူတစ်ဦးက စီမံကိန်းကော်မတီအဖွဲ့ခေါင်းဆောင်အား စီမံကိန်းလုပ်ငန်းတာဝန် ပေးအပ်သည်။

          ယခုဖွင့်လှစ်သော သင်တန်းတွင် အခြေခံစက်နင်းနည်း၊ ကိုယ်တိုင်းနည်း၊ Pattern ဆွဲနည်း၊ အင်္ကျီချုပ်နည်းအမျိုးမျိုး၊ စကပ်ချုပ်နည်း၊ ဂါဝန်ချုပ်နည်းနှင့် ကလေးဝတ်အင်္ကျီနှင့် ဘောင်းဘီ ချုပ်နည်းအမျိုးမျိုးတို့ကို ကိုယ်ပိုင်လုပ်ငန်းထူထောင်နိုင်သည်အထိ စာတွေ့ လက်တွေ့ သင်ကြား ပေးသွားမည်ဖြစ်ပြီး သင်တန်းဆင်းများထဲမှ အမှန်တကယ် ကိုယ်ပိုင်လုပ်ငန်းထူထောင်မည့် ထူးချွန် သင်တန်းသား (၅)ဦးအား သတ်မှတ်ချက်များနှင့်ရွေးချယ်ပြီး လုပ်ငန်းသုံးပစ္စည်းများ ပေးအပ် သွားမည်ဖြစ်ကြောင်း သတင်းရရှိပါသည်။