30 Jul,2025

မဲခေါင်-လန်ချန်းအဖွဲ့ဝင်နိုင်ငံများ၊ မြန်မာနိုင်ငံအတွင်း ကျေးလက်ရေရရှိရေး၊ လူမှုဘဝဖွံ့ဖြိုးတိုးတက်ရေးဆောင်ရွက်လျက်ရှိသော မိတ်ဖက်အဖွဲ့အစည်းများနှင့် အတွေ့အကြုံများမျှဝေဆွေးနွေးသည့် Knowledge Sharing ဖိုရမ်ကျင်းပ

နေပြည်တော် ဇူလိုင် ၃၀

          ‌သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာန က မဲခေါင်-လန်ချန်းပူးပေါင်းဆောင်ရွက်မှုအထူးရန်ပုံငွေ(၂၀၂၃)ဖြင့်  ရှမ်းပြည်နယ်(တောင်ပိုင်း) ညောင်ရွှေမြို့နယ်၊ ရပ်စောက်မြို့နယ်၊ လွိုင်လင်မြို့နယ်တို့အတွင်းရှိ ကျေးရွာများတွင် အကောင် အထည်ဖော်ဆောင်ရွက်သော တောင်ပေါ်ဒေသ ရေသန့်စင်စနစ်နှင့် အိမ်သွယ်ရေတိုင်စနစ်ပါဝင်သော စိမ့်စမ်းရေသွယ်ကျေးရွာရေရရှိရေးစီမံကိန်း ဆောင်ရွက်ပြီးစီးမှုနှင့်ပတ်သက်၍ အတွေ့ အကြုံနှင့် နည်းပညာများအား မဲခေါင်-လန်ချန်းအဖွဲ့ဝင်နိုင်ငံများနှင့် မြန်မာနိုင်ငံအတွင်း ကျေးလက်ရေရရှိရေးနှင့် လူမှုဘဝဖွံ့ဖြိုးတိုးတက်ရေးဆောင်ရွက်လျက်ရှိသော မိတ်ဖက်အဖွဲ့အစည်းများနှင့် အတွေ့အကြုံများမျှဝေဆွေးနွေးသည့် Knowledge Sharing ဖိုရမ်ကို ဇူလိုင်လ(၂၉)ရက်နေ့ နံနက်ပိုင်းက နေပြည်တော်ရှိ ရုံးအမှတ်(၃၆-ဘီ) ကျေးလက်ဒေသဖွံ့ဖြိုးတိုးတက်ရေးဦးစီးဌာန အစည်းအဝေးခန်းမ၌ ကျင်းပပြုလုပ်ခဲ့ကြောင်းသိရသည်။

အဆိုပါ ဖိုရမ်သို့ ကျေးလက်ဒေသဖွံ့ဖြိုးတိုးတက်ရေးဦးစီးဌာန ဒုတိယညွှန်ကြားရေးမှုူးချုပ်များ၊ ညွှန်ကြားရေးမှူးများ၊ စီမံကိန်းတာဝန်ရှိသူများနှင့်မိတ်ဖက်အဖွဲ့အစည်းများမှ ကျေးလက်ဒေသဖွံ့ဖြိုးတိုးတက်ရေးဦးစီးဌာန အစည်းအဝေးခန်းမ၌လည်းကောင်း၊ မြန်မာနိုင်ငံဆိုင်ရာ တရုတ်ပြည်သူ့သမ္မတနိုင်ငံသံရုံး ပထမအတွင်းဝန် မစ္စတာဝမ်ရှမ်ကျုံးနှင့် မဲခေါင်-လန်ချန်း အဖွဲ့ဝင်နိုင်ငံများဖြစ်သော ကမ္ဘောဒီယား၊ တရုတ်၊ လာအို၊ ထိုင်းနှင့် ဗီယက်နမ်နိုင်ငံတို့မှ ကိုယ်စားလှယ်များက Video Conferencing စနစ်ဖြင့်လည်းကောင်း အသီးသီးတက်ရောက်ကြပါသည်။

အခမ်းအနားတွင် ကျေးလက်ဒေသဖွံ့ဖြိုးတိုးတက်ရေးဦးစီးဌာန ဒုတိယညွှန်ကြားရေးမှုးချုပ် ဦးစိုးသန်းနှင့် တရုတ်ပြည်သူ့သမ္မတနိုင်ငံသံရုံး ပထမအတွင်းဝန် မစ္စတာဝမ်ရှမ်ကျုံးတို့က အဖွင့်အမှာစကားပြောကြားကြပါသည်။

ဆက်လက်၍ ကျေးလက်ဒေသဖွံ့ဖြိုးတိုးတက်ရေးဦးစီးဌာန စီမံကိန်းတာဝန်ရှိသူများက မဲခေါင်-လန်ချန်းစီမံကိန်းဆောင်ရွက်မှုနှင့် စီမံကိန်းဆောင်ရွက်မှုဆိုင်ရာနည်းပညာနှင့် လုပ်ငန်းစဉ်များအားလည်းကောင်း၊ ဖိုရမ်သို့တက်ရောက်လာသော ကမ္ဘောဒီယား၊ တရုတ်၊ လာအို၊ ထိုင်းနှင့် ဗီယက်နမ်နိုင်ငံတို့မှ ကိုယ်စားလှယ်များက မိမိတို့နိုင်ငံအလိုက် ဆောင်ရွက်လျက်ရှိသော ရေရရှိရေး စီမံကိန်းများနှင့်ပတ်သက်၍လည်းကောင်း၊ မြန်မာနိုင်ငံအတွင်း ကျေးလက်ရေရရှိရေးနှင့် လူမှုဘဝဖွံ့ဖြိုးရေးဆောင်ရွက်လျက်ရှိသော အဖွဲ့အစည်းများဖြစ်သည့် ယူနီဆက်၊ အာရှ-ဂျပန်ပူးပေါင်း ဆောင်ရွက်ရေးအဖွဲ့(Bride Asia Japan)၊ CESVI Myanmar နှင့် Helvetas Myanmar တို့မှ တာဝန်ရှိသူများက အဖွဲ့အစည်းအလိုက် စီမံကိန်းဆောင်ရွက်မှုများအားလည်းကောင်း အသီးသီးရှင်းလင်းတင်ပြကြရာ တက်ရောက်လာသူများက ဝိုင်းဝန်းဆွေးနွေးမေးမြန်းကြပါသည်။

ထို့နောက် ကျေးလက်ဒေသဖွံ့ဖြိုးတိုးတက်ရေးဦစီးဌာန ဒုတိယညွှန်ကြားရေးမှုးချုပ်က ဖိတ်ကြားထားသည့် ဧည့်သည်တော်များအား ဖိုရမ်အမှတ်တရ လက်ဆောင်ပစ္စည်းများ ပေးအပ်ပြီးနောက် နိဂုံးချုပ်အမှာစကားပြောကြားကာ အခမ်းအနားကို အောင်မြင်စွာ ရုတ်သိမ်းခဲ့ကြောင်း သတင်းရရှိပါသည်။