06 Aug,2025

မိတ္ထီလာ၊ ဩဂုတ် ၆

          သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ အသေးစားစက်မှုလက်မှုလုပ်ငန်းဦးစီးဌာန ကြီးကြပ်မှုအောက်ရှိ ရက်ကန်းနှင့်အသက်မွေးပညာသင်တန်းကျောင်း(မိထ္တီလာ)အနေဖြင့် ၂၀၂၅-၂၀၂၆ ဘဏ္ဍာရေးနှစ်အတွင်း အကောင်အထည်ဖော် ဆောင်ရွက်လျက်ရှိသည့် အသေးစားကုန်ထုတ် လုပ်ငန်းများဖန်တီးပေးနိုင်ရေးနှင့် ကျေးလက်နေမိသားစုဝင်ငွေတိုးရေးစီမံကိန်းဖြင့် ဝမ်းတွင်းမြို့နယ်၊ ဇီးကျင်းကျေးရွာမှ ကိုယ်ပိုင်လုပ်ငန်းထူထောင်လိုသူ(၅)ဦးအား လုပ်ငန်းသုံးပစ္စည်းပေးအပ်ပွဲအား ဩဂုတ်လ ၅ ရက်နေ့က အဆိုပါ ရက်ကန်းကျောင်း၌ ကျင်းပသည်။

          ရက်ကန်းနှင့်အသက်မွေးပညာသင်တန်းကျောင်း(မိတ္ထီလာ)အနေဖြင့် ဝမ်းတွင်းမြို့နယ်၊ ဇီးကျင်း ကျေးရွာ၌ သင်တန်းသား (၁၅)ဦးအား စက်ချုပ်နည်းပညာသင်တန်း(အခြေခံနှင့်မွမ်းမံ)အား ကိုယ်ပိုင် လုပ်ငန်း ထူထောင်နိုင်သည်အထိ စာတွေ့ လက်တွေ့ သင်ကြားပေးခဲ့ပြီး အဆိုပါ သင်တန်းသား (၁၅) ဦးထဲမှ အမှန်တကယ် ကိုယ်ပိုင်လုပ်ငန်းထူထောင်မည့် ထူးချွန်သင်တန်းသား (၅) ဦးအား သတ်မှတ်ချက်များ နှင့်အညီ ရွေးချယ်ခဲ့ကြောင်း သိရှိရပါသည်။

          ယခုအခမ်းအနားတွင် လုပ်ငန်းထူထောင်ရာတွင်လိုအပ်သော စက်ချုပ်စက်၊ စက်ခုံ၊ ဓားစက်၊  အပ်ချည်လုံးများ၊ လျှပ်စစ်မီးပူ၊ မီးပူတင်စင်၊ မီးပူတိုက်ခုံနှင့် ထုပ်သီးရိုက်စက် စသည်တို့ကို ပေးအပ်ခဲ့ကြောင်း သတင်းရရှိပါသည်။