29 May,2026

ဘုတ်ပြင်းမြို့နယ် ကျေးရွာ ၂ ရွာ၌ မြစိမ်းရောင်စီမံကိန်းရန်ပုံငွေ သတ္တမအကြိမ်မြောက် ထုတ်ချေး

‎************************************************************************

‎ဘုတ်ပြင်း         မေ      ၂၉

‎‎သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ တနင်္သာရီတိုင်းဒေသကြီး၊ ဘုတ်ပြင်းခရိုင်၊ ဘုတ်ပြင်း မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနက ကျေးလက်နေပြည်သူများ တနိုင်တပိုင် အသေးစားစီးပွားရေးလုပ်ငန်းများဆောင်ရွက်ရန် အတိုးနှုန်းသက်သာသည့် ငွေကြေးအရင်းအနှီး ရရှိစေရန်၊ တိုးပွားလာသော ရန်ပုံငွေများဖြင့် ကျေးရွာအတွက် အမှန်တကယ်လိုအပ်သော ဖွံ့ဖြိုးရေး လုပ်ငန်းများ ဆောင်ရွက်ရန်နိုင်အတွက် သဲဖြူ+ကျွေးချောင်းကျေးရွာ၌ မြစိမ်းရောင်စီမံကိန်း အရင်း မပျောက်လည်ပတ်ရန်ပုံငွေ သတ္တမအကြိမ်မြောက် ထုတ်ချေးပေးခြင်းကို (၂၈-၅-၂၀၂၆)ရက်နေ့နံနက်ပိုင်းက သဲဖြူကျေးရွာ စုပေါင်းခန်းမ၌ ကျင်းပပြုလုပ်ခဲ့ကြောင်းသိရသည်။

‎‎ရှေးဦးစွာ ဘုတ်ပြင်းမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဦးဇော်မိုးမြင့် က စီမံကိန်းရန်ပုံငွေများ ဆုံးရှုံးမှု မရှိစေရေး စနစ်တကျထိန်းသိမ်းဆောင်ရွက်သွားရန်လိုကြောင်း ၊ စီမံကိန်းရန်ပုံငွေဖြင့် လုပ်ငန်းများ အမှန်တကယ်ဆောင်ရွက်ပြီး မိသားစုဝင်ငွေတိုးပွားရေးကို စနစ်တကျဆောင်ရွက် ပေးစေလိုကြောင်း၊ စီမံကိန်းအကောင်အထည်ဖော် ဆောင်ရွက်ခြင်းနှင့် စပ်လျဉ်း၍ အခက်အခဲများ များရှိပါက တင်ပြပေးစေလိုကြောင်း ဆွေးနွေးပြောကြားသည်။

‎‎ဆက်လက်၍ မြို့နယ်ဦးစီးမှူး ‌ဦးဇော်မိုးမြင့်က မြစိမ်းရောင်စီမံကိန်းအရင်းမပျောက် လည်ပတ်ရန်ပုံငွေကျပ် ၄၆၂ သိန်း အား သဲဖြူ+ကျွေးချောင်းကျေးရွာ မြစိမ်းရောင်စီမံကိန်း လုပ်ငန်းအဖွဲ့ထံသို့ လွှဲပြောင်းပေးအပ်သည်။

‎‎ထို့နောက် ဘုတ်ပြင်းမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ စီမံကိန်းတာဝန်ခံ ဝန်ထမ်းများ၏ အနီးကပ်ကြီးကြပ်မှုဖြင့် မြစိမ်းရောင်စီမံကိန်းလုပ်ငန်းအဖွဲ့ဝင်များက ကျေးရွာရှိ တနိုင်တပိုင်အသေးစားစီးပွားရေးလုပ်ငန်း လုပ်ကိုင်သူ စီမံကိန်းအသင်းဝင် ၇၂ ဦးကို အရင်းမပျောက် လည်ပတ်ရန်ပုံငွေကျပ် ၄၆၂ သိန်း အား အတိုးနှုန်းသက်သာစွာဖြင့် တစ်ဦးချင်းလက်ဝယ်အရောက် စနစ်တကျ ထုတ်ချေးပေးခဲ့ကြောင်း ဘုတ်ပြင်းမြို့နယ် ကျေးလက်ဒေသဖွံ့ ဖြိုးတိုးတက်ရေးဦးစီးဌာနမှ သိရသည်။

‎