13 Mar,2023

နေပြည်တော် မတ် ၁ဝ

          မကွေးတိုင်းဒေသကြီး သရက်ခရိုင်အတွင်းရှိ ကျေးရွာ ၂၉၃ ရွာတွင် နေထိုင်သည့် ပြည်သူ ၁၉၃၅၅၆ ဦးကို အကျိုးပြုနိုင်ရန်အတွက် သရက်ခရိုင်ကျေးလက်လမ်းဖွံ့ဖြိုးရေးဦးစီးဌာနက ခရိုင်အတွင်းရှိ ကျေးလက်လမ်း၊ တံတားများကို အဆင့်မြှင့်တင်ဆောင်ရွက်နိုင်ခဲ့ကြောင်း သိရသည်။

             “၂၀၂၂ -၂၀၂၃ဘဏ္ဍာနှစ်တွင် ပြည်ထောင်စု/တိုင်းဒေသကြီး (ငွေလုံးငွေရင်း၊ ဖြည့်စွက်၊ ပြင်/ထိန်း၊ ဒေသဖွံ့ဖြိုးရေး) ရန်ပုံငွေနဲ့ ကွန်ကရစ်လမ်း ၁ မိုင် ၆ ဖာလုံ၊ ကတ္တရာလမ်း ၂ မိုင် ၂ ဒသမ ၇၅ ဖာလုံ၊ ကျောက်ချောလမ်း ၃ မိုင် ၇ ဒသမ ၈၂ ဖာလုံ ၊ ဂဝံ/ မြေနီ ၇၂ မိုင် ၆ ဖာလုံ၊ Submersible bridge တစ်စင်း၊ ကွန်ကရစ်တံတား ခုနစ်စင်း၊ ရေကျော် ခုနစ်စင်း၊ Box Culvert ၁၉ စင်းနဲ့ အခြားလုပ်ငန်းတစ်ခုကို အဆင့်မြှင့်တင် ဆောင်ရွက်နိုင်ခဲ့ပါတယ်”ဟု ခရိုင်ကျေးလက်လမ်းဖွံ့ဖြိုးရေးဦးစီးဌာန လက်ထောက်ညွှန်ကြားရေးမှူး (မြို့ပြ) ဒေါ်ဇာလှိုင်သန်းက ပြောသည်။

            ထို့အတူ ခရိုင်အတွင်းရှိလမ်းမိုင် ၁၄ မိုင် ၃ ဒသမ ၄၅ ဖာလုံ နှင့် တံတား ၁၅ စင်းတို့ကို ပြင်ဆင်ထိန်းသိမ်းခြင်း လုပ်ငန်းများ ဆောင်ရွက်လျက်ရှိကြောင်းသိရသည်။ ၂၀၂၂-၂၀၂၃ ခု ဘဏ္ဍာ နှစ်ကုန်တွင် ကျေးလက်လမ်းပေါင်း ၅၀၄ လမ်းနှင့် မိုင်ပေါင်း၁၃၄၅ မိုင် ၇ ဒသမ ၆၆ ဖာလုံနှင့် အဆိုပါလမ်းများပေါ်ရှိ တံတားပေါင်း ၃၀၉ စင်း အဆင့်မြှင့်တင် ဆောင်ရွက်နိုင်မည်ဖြစ်ပြီး ၂၀၃၀ ပြည့်နှစ်တွင် မြန်မာနိုင်ငံရှိ ကျေးရွာများအားလုံး (၈၀ ရာခိုင်နှုန်း) ရာသီမရွေး သွားလာနိုင်ရန် ကြိုးပမ်းဆောင်ရွက်လျက်ရှိကြောင်း သိရသည်။

ဇော်ဘီ