12 Jun,2023

နေပြည်တော် ဇွန် ၁၂

သမဝါယမနှင့် ကျေးလက်ဒေသဖွံ့ဖြိုးရေးဝန်ကြီးဌာန၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနက ဦးစီးဌာန ဝန်ထမ်းများ စွမ်းဆောင်ရည်မြင့်မားလာစေရန်နှင့် ရုံးလုပ်ငန်းများဆောင်ရွက်ရာတွင် အဆင်ပြေချောမွေ့စေရေး အတွက်ရည်ရွယ်၍ အဆင့်မြင့်ကွန်ပျူတာသင်တန်းဖွင့်ပွဲ အခမ်းအနားကို ယနေ့ နံနက် ၉ နာရီ ၃၀ မိနစ်အချိန်က နေပြည်တော်ရှိ ရုံးအမှတ်(၃၆)၌ ကျင်းပပြုလုပ်ခဲ့ကြောင်းသိရသည်။

ရှေးဦးစွာ ကျေးလက်ဒေသဖွံ့ဖြိုးတိုးတက်ရေးဦးစီးဌာန ဒုတိယညွှန်ကြားရေးမှူးချုပ် ဒေါ်ညိုညိုဝင်းက မိမိတို့ ဦးစီးဌာနရှိ ဝန်ထမ်းများ ကွန်ပျူတာနည်းပညာနှင့် ရုံးလုပ်ငန်းများဆောင်ရွက်ရာတွင် အဆင်ပြေချောမွေ့စေရန် ရည်ရွယ်၍ ဖွင့်လှစ်ရခြင်းဖြစ်ကြောင်း၊ သင်တန်းသား သင်တန်းသူများအနေဖြင့် သင်တန်းတွင်ပို့ချမည့် ဘာသာရပ် များကို ကြိုးစားသင်ယူကြရန် အဖွင့်အမှာစကားတွင် ထည့်သွင်းပြောကြားပါသည်။

ဆက်လက်၍ သင်တန်းနည်းပြ ဆရာမများက သင်တန်းတွင် ပို့ချမည့် ကွန်ပျူတာဘာသာရပ်ဆိုင်ရာများကို ရှင်းလင်းပြောကြားပါသည်။

အဆိုပါ အဆင့်မြင့်ကွန်ပျူတာသင်တန်းကို သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီးရုံး မှ တစ်ဦး၊ သမဝါယမဦးစီးဌာနမှ တစ်ဦး၊ အသေးစားစက်မှုလက်မှုလုပ်ငန်းဦးစီးဌာနမှ တစ်ဦး၊ ကျေးလက်ဒေသ ဖွံ့ဖြိုးတိုးတက်ရေးဦးစီးဌာနမှ (၁၇)ဦး၊ စုစုပေါင်းသင်တန်းသား(၂၀)ဦး တက်ရောက်ခဲ့ကြပြီး သင်တန်းကို ဇွန်လ  ၁၂ ရက်နေ့မှ ၃၀ ရက်နေ့အထိ ဖွင့်လှစ် သင်ကြားပို့ချသွားမည်ဖြစ်ကြောင်းသိရသည်။