12 Jun,2023

နေပြည်တော် ဇွန် ၁၂

     သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ကျေးလက်လမ်းဖွံ့ဖြိုးရေးဦးစီးဌာနမှ ၂၀၂၂-၂၀၂၃ ဘဏ္ဍာရေးနှစ်အသစ်ခန့်အမြဲတမ်းဝန်ထမ်းရာထူးနေရာများဖြစ်သည့် အငယ်တန်းအင်ဂျင်နီယာ (၃) (မြို့ပြ) ၊အငယ်တန်းအင်ဂျင်နီယာ(၄)(မြို့ပြ)တို့အား  ဝန်ထမ်းများ စွမ်းဆောင်ရည်မြင့်မားလာစေရန် ရည်ရွယ်၍ လုပ်ငန်းခွင်ဝင်သင်တန်း အမှတ်စဉ်(၃/၂၀၂၃)သင်တန်းဖွင့်ပွဲ အခမ်းအနားကို ယနေ့ နံနက် ၉ နာရီ ၃၀ မိနစ် အချိန်က နေပြည်တော် ကျေးလက်လမ်းဖွံ့ဖြိုးရေးဦးစီးဌာန (ရုံးချုပ်) အစည်းမဝေးခန်းမ၌  ကျင်းပပြုလုပ်ခဲ့ကြောင်းသိရသည်။

     ရှေးဦးစွာ ကျေးလက်လမ်းဖွံ့ဖြိုးရေးဦးစီးဌာန ညွှန်ကြားရေးမှူးချုပ် (ကိုယ်စား) ဒုတိယညွှန်ကြားရေးမှူးချုပ်(စီမံရေး)ဦးဝင်းသိန်းက မိမိတို့ ဦးစီးဌာနရှိ ဝန်ထမ်းများ လုပ်ငန်းခွင် စွမ်းဆောင်ရည် မြင့်မားလာစေရန် ရည်ရွယ်၍ ဖွင့်လှစ်သည့်သင်တန်းဖြစ်သည့်အတွက် သင်တန်းသား သင်တန်းသူများအနေဖြင့် သင်တန်းကာလတစ်လျှောက်ကြိုးကြိုးစားစား သင်ယူ၍ အလေးထားမှတ်သားထားကြရန်လိုအပ်ပါကြောင်း၊ သင်တန်းတွင် စာတွေ့လက်တွေ့နှင့် တံတားလုပ်ငန်းခွင်များသို့ သွားရောက်ပို့ချ/ပြသပေးသွားမည်ဖြစ်ပါကြောင်း၊ အချိန်တိုအတွင်း ဝန်ကြီးဌာန၏မူဝါဒ၊ ဌာန၏ဆောင်ရွက်ချက်များနှင့် ပညာရပ်ပိုင်းဆိုင်ရာဗဟုသုတများ စသည်တို့ကိုလေ့လာသင်ယူရမည်ဖြစ်သည့်အတွက် အလေးအနက်ထားသင်ယူကြစေလိုကြောင်းနှင့် သင်တန်းကာလအတွင်း ကျန်းမာရေးဂရုတစိုက်နေထိုင်ကြရန် အဖွင့်အမှာစကားတွင် ထည့်သွင်းပြောကြားပါသည်။

      အဆိုပါ လုပ်ငန်းခွင်ဝင်သင်တန်း အမှတ်စဉ်(၃/၂၀၂၃)ကို သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ကျေးလက်လမ်းဖွံ့ဖြိုးရေးဦးစီးဌာနမှ (၄၅)ဦး၊ ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ (၁၀)ဦး၊ စုစုပေါင်းသင်တန်းသား(၅၅)ဦး တက်ရောက်ခဲ့ကြပြီး သင်တန်းကို (၁၂-၆-၂၀၂၃) ရက်နေ့မှ (၁၆-၆-၂၀၂၃) ရက်နေ့အထိ သင်ကြားပို့ချသွားမည်ဖြစ်ကြောင်းသိရသည်။