11 Nov,2024

မကွေး   နိုဝင်ဘာ ၉

            မကွေးတိုင်းဒေသကြီး မကွေးမြို့နယ်ကျေးလက်လမ်းဦးစီးဌာနမှ ၂၀၂၄- ၂၀၂၅ ဘဏ္ဍာနှစ်တွင် မကွေး- တောင်တွင်းကြီး- မြင်ကွန်းလမ်းမှ မြစ်သာစည်ကျေးရွာ အဝင်လမ်းပေါ်၌ ကွန်ကရစ်တံတားတည်ဆောက်နေမှု အခြေအနေများကို တာဝန်ရှိသူများက နိုဝင်ဘာလ ၉ ရက်တွင် ကွင်းဆင်းစစ်ဆေးကြကြောင်းသိရသည်။

           ထိုသို့ကွင်းဆင်းစစ်ဆေးရာတွင် သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ကျေးလက်လမ်းဖွံ့ဖြိုးရေးဦးစီးဌာန(ရုံးချုပ်)မှ အင်ဂျင်နီယာချုပ်နှင့် ဝန်ထမ်းများက မကွေး-တောင်တွင်းကြီး-မြင်ကွန်းလမ်းမှ မြစ်သာစည်ကျေးရွာ အဝင်လမ်းပေါ်၌ ကွန်ကရစ်တံတားတည်ဆောက်နေမှု အခြေအနေများကို ကြည့်ရှုစစ်ဆေးရာ တင်ဒါရကုမ္ပဏီက လုပ်ငန်းတိုးတက်မှု အခြေအနေများ၊ ရှေ့ဆက်လက်ဆောင်ရွက်မည့် အခြေအနေများကို ရှင်းလင်းတင်ပြပြီး အင်ဂျင်နီယာချုပ်က လုပ်ငန်းများအချိန်မီ ပြီးစီးရေး၊ စံချိန်စံညွှန်းသတ်မှတ်ချက်များနှင့်အညီ ဆောင်ရွက်သွားရန် မှာကြားသည်။

        မကွေးမြို့နယ်မကွေး-တောင်တွင်းကြီး-မြင်ကွန်းလမ်းမှ မြစ်သာစည်ကျေးရွာအဝင်လမ်းပေါ်၌ အရှည်ပေ ၃၀၊ အကျယ် ပေ ၂၀၊ အမြင့် ၁၃ ပေ ၆ လက်မရှိသော ကွန်ကရစ်တံတားတည်ဆောက်ခြင်းလုပ်ငန်းကို တိုင်းဒေသကြီးရန်ပုံငွေကျပ် ၁၃၁ ဒသမ ၅၁ သန်းဖြင့် Infrastructure Force ကုမ္ပဏီမှ တာဝန်ယူ၍ စက်တင်ဘာလ ဒုတိယပတ်မှ စတင်အကောင်အထည်ဖော်ဆောင်ရွက်ရာ ယခုအခါ ၄၅ ရာခိုင်နှုန်းကျော် ဆောင်ရွက်ပြီးစီးနေပြီဖြစ်ကြောင်း မကွေးမြို့နယ်ကျေးလက်လမ်းဖွံ့ဖြိုးရေးဦးစီးဌာနမှ မြို့နယ်တာဝန်ခံ ဦးအောင်ဇင်လတ်ထံမှ သိရသည်။

ကိုညို(ကျေးလက်)