08 May,2025

မိတ္ထီလာ မေ ၄

         မန္တလေးတိုင်းဒေသကြီး၊ မိတ္ထီလာမြို့နယ်တွင် ၂၀၂၄-၂ဝ၂၅ ဘဏ္ဍာရေးနှစ်နှင့် ၂ဝ၂၅-၂၀၂၆ ဘဏ္ဍာရေးနှစ် ပြည်ထောင်စု ပြင်ဆင်ထိန်းသိမ်းခြင်းရန်ပုံငွေဖြင့် မိတ္ထီလာ-သာစည်လမ်းမှ စက်ပစ် တောင် ကျေးရွာသွားလမ်းပေါ်ရှိ စက်ပစ်တောင်တံတား ပြန်လည်ပြုပြင်တည်ဆောက်လုပ်ငန်း ရာနှုန်းပြည့်ပြီးစီးပြီဖြစ်ကြောင်း မြို့နယ်ကျေးလက်လမ်းဖွံ့ဖြိုးရေးဦးစီးဌာနမှ သိရသည်။

        မြို့နယ်ကျေးလက်လမ်းဖွံ့ဖြိုးရေးဦးစီးဌာနမှ ကျေးလက်နေပြည်သူများသွားလာရာတွင် အဆင်ပြေစေရန် နှစ်စဉ်ဘဏ္ဍာရေးနှစ်အလိုက် လမ်းအဆင့်မြှင့်တင်ခြင်းလုပ်ငန်းများ၊ တံတားပြု ပြင်တည်ဆောက်ခြင်းလုပ်ငန်းများ ဆောင်ရွက်လျက်ရှိသည်။ထိုသို့ဆောင်ရွက်လျက်ရှိရာမှ မိတ္ထီလာ-သာစည်လမ်းမှ စက်ပစ်တောင်ကျေးရွာသွားလမ်းပေါ်ရှိ စက်ပစ်တောင်တံတားအား ၂ဝ၂၄-၂ဝ၂၅ ဘဏ္ဍာရေးနှစ်နှင့် ၂၀၂၅-၂၀၂၆ ဘဏ္ဍာရေးနှစ်ပြည်ထောင်စုပြင်ဆင်ထိန်းသိမ်းခြင်းရန်ပုံငွေကျပ် ၃၇ ဒသမ ၆၅ သန်းဖြင့် မိတ္ထီလာမြို့နယ်ကျေးလက်လမ်းဖွံ့ဖြိုးရေးဦးစီးဌာနမှ တံတားအရှည် ပေ ၄ဝ၊ အကျယ် ၁၂ ပေ ရှိ တံတားအား တံတားရက်မအောက်တွင်  သံကူကွန်ကရစ် Bearing Beam များဆောင်ရွက်ခြင်းနှင့် မူလ Beam များအား Diaphragm ဆောင်ရွက်ခြင်းနှင့်၊ တံတားကြမ်းခင်းနှင့် တံတားလက်ရန်း ပြုပြင်ခြင်းလုပ်ငန်းများကို မတ်လမှ စတင်၍ ဆောင်ရွက်လျက်ရှိရာ အဆိုပါတံတားပြန်လည်ပြုပြင်တည်ဆောက်ခြင်းလုပ်ငန်းမှာ ရာနှုန်းပြည့်ပြီးစီးပြီ ဖြစ်ကြောင်း သိရသည်။

(၄၆၉)