22 Sep,2025

ရန်ကုန်၊ စက်တင်ဘာ ၂၂

          သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန၊ ရန်ကုန်တိုင်းဒေသကြီး အသေးစားစက်မှု လက်မှုလုပ်ငန်းဦးစီးဌာန အနေဖြင့် မူးယစ်‌ဆေးစွဲကုသပြီး ပြန်လည်ထူထောင်မှုခံယူလျက်ရှိသည့် သင်တန်းသား(၂၀)ဦးအား အလုပ်အကိုင်အခွင့်အလမ်းရရှိစေရန်ရည်ရွယ် လူသုံးကုန်ထုတ်လုပ်မှု နည်းပညာသင်တန်းဖွင့်ပွဲ အခမ်းအနားကို ယနေ့ နံနက်ပိုင်းက ပြန်လည်ထူထောင်ရေးစခန်း (ရန်ကုန်)၌ ကျင်းပသည်။

          အခမ်းအနားသို့  ရန်ကုန်တိုင်းဒေသကြီးအစိုးရအဖွဲ့ သယံဇာတရေးရာဝန်ကြီး ဦးဇော်ဝင်း၊ ပြန်လည်ထူထောင်ရေးဦးစီးဌာနမှ ဒုတိယညွှန်ကြားရေးမှူးချုပ်၊ ရန်ကုန်တိုင်းဒေသကြီးအသေးစားစက်မှုလက်မှုလုပ်ငန်းဦးစီးဌာန တိုင်းဦးစီးမှူး၊ သက်ဆိုင်ရာဌာနများမှ တာဝန်ရှိပုဂ္ဂိုလ်များ၊ သင်တန်းနည်းပြများနှင့် သင်တန်းသားများ တက်ရောက်ကြပါသည်။

          ဦးစွာ ရန်ကုန်တိုင်းဒေသကြီးအစိုးရအဖွဲ့ သယံဇာတရေးရာဝန်ကြီးက အဖွင့်အမှာစကားပြောကြားပြီး ရန်ကုန်တိုင်းဒေသကြီးအသေးစားစက်မှုလက်မှုလုပ်ငန်းဦးစီးဌာန တိုင်းဦးစီးမှူးက ဌာနမှ ဆောင်ရွက်လျက်ရှိသည့် လုပ်ငန်းများနှင့် ဝင်ငွေတိုးစီမံကိန်းအကြောင်းတို့အား ရှင်းလင်းပြောကြားသည်။

          ယခုဖွင့်လှစ်သောသင်တန်းတွင် ဆပ်ပြာရည်အမျိုးမျိုးပြုလုပ်ခြင်း၊ ခေါင်းလျှော်ရည်ပြုလုပ်ခြင်း၊ ဆပ်ပြာခဲအမျိုးမျိုးပြုလုပ်ခြင်း၊ ပန်းကန်ဆေးဆပ်ပြာပြုလုပ်ခြင်း၊ လက်ဆေးဆပ်ပြာပြုလုပ်ခြင်း၊ ရေချိုးဆပ်ပြာပြုလုပ်ခြင်း၊ အဝတ်လျှော်ဆပ်ပြာပြုလုပ်ခြင်းတို့ကို ကိုယ်ပိုင်လုပ်ငန်း ထူထောင်နိုင်အောင် စက်တင်ဘာလ ၂၂ ရက်နေ့မှ ၂၆ ရက်နေ့အထိ စာတွေ့လက်တွေ့ သင်ကြားပို့ချသွားမည် ဖြစ်ကြောင်း သတင်းရရှိပါသည်။