26 Sep,2025

သရက်ခရိုင်အတွင်းရှိ  ကျေးလက်လမ်း၊ တံတားလုပ်ငန်းများကွင်းဆင်းစစ်ဆေး

************************************************************************

သရက်   စက်တင်ဘာ    ၂၆

မကွေးတိုင်းဒေသကြီး၊ သရက်ခရိုင်ကျေးလက်လမ်းဖွံ့ဖြိုးရေးဦးစီးဌာနက ကျေးလက်နေပြည်သူများ လူမှုစီးပွားဘဝဖွံ့ဖြိုးတိုးတက်စေရန်အတွက် ၂၀၂၅-၂၀၂၆ ဘဏ္ဍာနှစ်တွင် ပြည်ထောင်စု၊ တိုင်းဒေသကြီး(ငွေလုံးငွေရင်း)ရန်ပုံငွေကျပ် ၁၅၄၂ ဒသမ ၃၈သန်းဖြင့် ဆောင်ရွက် လျက်ရှိသော ကျေးလက်လမ်း၊ တံတားလုပ်ငန်းများ၏ လုပ်ငန်းဆောင်ရွက်နေမှုအခြေအနေများကို ယမန်နေ့က မကွေးတိုင်းဒေသကြီး ကျေးလက်လမ်းဖွံ့ဖြိုးရေးဦးစီးဌာန ညွှန်ကြားရေးမှူး(မြို့ပြ) ဦးဝင်းမိုးထိုက်နှင့် ခရိုင်၊ မြို့နယ်တာဝန်ရှိသူများက ကွင်းဆင်းကြည့်ရှုစစ်ဆေးခဲ့သည်။

ထိုသို့ ကွင်းဆင်းစစ်ဆေးရာတွင် သရက်မြို့နယ် သရက်-ကံမလမ်းမှ သဲဖြူ-ပိဿလိမ်း လမ်းပေါ်တွင် ပေ ၁၄၀ ရေကျော်ဆက်ခြင်း၊ ပြရေ-ပုထိုးလမ်းပေါ်တွင် ပေ ၂၅၀ မြေထိန်းနံရံ တည် ဆောက်ခြင်းလုပ်ငန်းများကို ကြည့်ရှုစစ်ဆေးခဲ့သည်။

ဆက်လက်၍ အောင်လံမြို့နယ် အောင်လံ-ကျောက်ပန်းတောင်း-သမ္ဘူလလမ်းမှ ရွှေပန်း တောလေး လမ်း(၀/၄)မိုင် ကွန်ကရစ်ခင်းခြင်း၊ ကန်နှစ်ဆင့်-ရေနံကြီးလမ်းပေါ်ရှိ ကြေးနီချောင်းကူး တံတား ပေ ၂၀၀ တည်ဆောက်ခြင်းလုပ်ငန်းများကိုလည်းကောင်း ကြည့်ရှုစစ်ဆေးခဲ့သည်။

ထို့နောက် ဆင်ပေါင်ဝဲမြို့နယ် ဆင်ပေါင်ဝဲ-ကိုးပင်လမ်းနှင့် ကျွဲခြံကျေးရွာသို့ဆက်သွယ်သော လမ်း(၀/၆)မိုင် ကတ္တရာခင်းခြင်း၊ သမန်းကြီး-မကြီးကုန်း-ညောင်လှလမ်းပေါ်၌ ပေ ၁၅၀ ရေကျော်ဆက်ခြင်းလုပ်ငန်းများကို ကွင်းဆင်းကြည့်ရှုစစ်ဆေးပြီး သက်ဆိုင်ရာတာဝန်ရှိသူများက လုပ်ငန်းဆောင်ရွက်နေမှုနှင့် ဆက်လက်ဆောင်ရွက်မည့် အစီအစဉ်များကို ရှင်းလင်းတင်ပြမှုအပေါ် ညွှန်ကြားရေးမှူး(မြို့ပြ) ဦးဝင်းမိုးထိုက်က သတ်မှတ်စံချိန်စံညွှန်းနှင့်အညီ အချိန်မီပြီးစီးရေး အလေးထားဆောင်ရွက်သွားရန်နှင့် လိုအပ်သည်များဖြည့်စွက်မှာကြားခဲ့သည်။

အဆိုပါကျေးလက်လမ်း၊ တံတားလုပ်ငန်းများကို ကျေးလက်လမ်းဖွံ့ဖြိုးရေးဦးစီးဌာန၊ တင်ဒါအောင်ကုမ္ပဏီများမှ တာဝန်ယူဆောင်ရွက်လျက်ရှိပြီး လုပ်ငန်းပြီးစီးပါက ကျေးလက်နေပြည်သူများ၏ ပညာရေး၊ ကျန်းမာရေး၊ လူမှုရေးဆိုင်ရာကိစ္စရပ်များနှင့် ဒေသထုတ်ကုန်၊ ထွက်ကုန်များ အချိန်မီသယ်ယူပို့ဆောင်နိုင်မည်ဖြစ်ကြောင်း သိရသည်။

ဆက်လူ