28 Nov,2025

နေပြည်တော် နိုဝင်ဘာ ၂၇

သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီးရုံးနှင့် ဝန်ကြီးဌာန ကွပ်ကဲမှုအောက်ရှိ ဦးစီးဌာနများတွင် တာဝန်ထမ်းဆောင်ကြမည့် ပြည်ထောင်စုတိုင်းရင်းသား လူငယ်များစွမ်းရည်ဖွံ့ဖြိုးရေးဒီဂရီကောလိပ် ရန်ကုန်နှင့် စစ်ကိုင်းတို့မှ ကျောင်းဆင်းဝန်ထမ်းများအား လုပ်ငန်းခွင်ဝင်သင်တန်းဆင်းပွဲအခမ်းအနားကို ယနေ့မွန်လွဲပိုင်းက နေပြည်တော်ရှိ ရုံးအမှတ်(၃၆-ဘီ) ကျေးလက်ဒေသဖွံ့ဖြိုးတိုးတက်ရေးဦးစီးဌာန သင်တန်းခန်းမ၌ ကျင်းပပြုလုပ်ရာ ဒုတိယဝန်ကြီး ဦးသိုက်စိုးနှင့် ဦးစီးဌာနများမှ တာဝန်ရှိသူများ တက်ရောက်ကြပါသည်။

အခမ်းအနားတွင် ဒုတိယဝန်ကြီးက တာဝန်ကျရာနေရာများတွင် မိမိရာထူးနှင့် လျော်ညီသည့် တာဝန်များကို ကျေကျေပွန်ပွန် ထမ်းဆောင်ရင်း မိမိတို့ဝန်ကြီးဌာန၊ ဦးစီးဌာနနှင့် နိုင်ငံတော်၏ ဂုဏ်ကို ထိန်းသိမ်းစောင့်ရှောက်ရန်၊ ပြည်ထောင်စုစိတ်ဓာတ်ပြည့်ဝသော ဝန်ထမ်းကောင်းများ ဖြစ်အောင် ကြိုးစားအားထုတ်သွားကြရန်၊ ဝန်ကြီးဌာန၏ မျှော်မှန်းချက်၊ ရည်မှန်းချက်များနှင့်အညီ လုပ်ငန်းတာဝန်များကို အောင်မြင်အောင် ထမ်းဆောင်ကြရန်၊ သင်တန်းမှ ပို့ချခဲ့သည့် သင်ခန်းစာ များကို လုပ်ငန်းခွင်တွင် ထိထိရောက်ရောက်အသုံးချပြီး လုပ်ငန်းများ အောင်မြင်စွာဆောင်ရွက် ကြရန် တိုက်တွန်းပြောကြားပါသည်။

ယင်းနောက် ဒုတိယဝန်ကြီးက ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေး ဒီဂရီကောလိပ် ရန်ကုန်နှင့် စစ်ကိုင်းတို့မှ ကျောင်းဆင်းဝန်ထမ်း (၉၃) ဦးအား သင်တန်းဆင်း အောင်လက်မှတ်များ ပေးအပ်ခဲ့သည်။

ယခုသင်တန်းတွင် ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေးဒီဂရီကောလိပ် (ရန်ကုန်နှင့် စစ်ကိုင်း)တို့မှ  သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ပြည်ထောင်စုဝန်ကြီးရုံး နှင့် ဝန်ကြီးဌာနကွပ်ကဲမှုအောက်ရှိ ဦးစီးဌာနများတွင် ရောက်ရှိတာဝန်ထမ်းဆောင်ကြမည့် သင်တန်းသား သင်တန်းသူ စုစုပေါင်း(၉၃)ဦးအား ဝန်ကြီးဌာနနှင့် ဦးစီးဌာနများအကြောင်း မိတ်ဆက်ခြင်း၊ ရုံးလုပ်ထုံးလုပ်နည်းများ၊ လုပ်ငန်းခွင်အတွင်း လိုက်နာရမည့် ဆောင်ရန်/‌ ရှောင်ရန်အချက်များနှင့် ဦးစီးဌာနများမှ ဆောင်ရွက်လျက်ရှိသည့် စီမံကိန်းနှင့် လုပ်ငန်းများအား သင်ကြားပို့ချပေးခဲ့ကြောင်း သိရသည်။

သင်တန်းဆင်းပွဲအခမ်းအနားအပြီးတွင် ဒုတိယဝန်ကြီးနှင့် တာဝန်ရှိသူများသည် ကျေးလက် ဒေသဖွံ့ဖြိုးတိုးတက်ရေးဦးစီးဌာန ဝန်ထမ်းသက်သာကုန်မျိုးစုံအရောင်းဆိုင်အား ကြည့်ရှုအားပေး ခဲ့ကြောင်း သတင်းရရှိပါသည်။