23 Dec,2025

နေပြည်တော် ဒီဇင်ဘာ ၂၂

          သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ဒုတိယဝန်ကြီး ဦးသိုက်စိုးသည် ယနေ့ မွန်းလွဲပိုင်းက တာဝန်ရှိသူများလိုက်ပါလျက် ပဲခူးတိုင်းဒေသကြီး၊ ရန်ကုန်-မန္တလေး ကားလမ်း ဟောင်း၏ အရှေ့ဘက် (၃) မိုင်ခန့်အကွာတွင် တည်ရှိသော ပဲခူးမြို့နယ်၊ မုက္ကလကျေးရွာသို့ သွားရောက်၍ ကျေးလက်ဒေသဖွံ့ဖြိုးတိုးတက်ရေးဦးစီးဌာန၏ ၂၀၂၅-၂၆ ဘဏ္ဍာနှစ် ပြည်ထောင်စု ခွင့်ပြုရန်ပုံငွေဖြင့် ကျေးရွာကုန်ထုတ်လမ်း ပေ (၄၆၂၀) ဖောက်လုပ်ပြီးစီးမှုအား ကြည့်ရှုစစ်ဆေးပြီး လိုအပ်သည်များ မှာကြားခဲ့သည်။ အဆိုပါကုန်ထုတ်လမ်းသည် ကျေးရွာရှိ အိမ်ခြေ (၄၇၄) အိမ်၊ တောင်သူ (၂၀၃) ဦး၏ စိုက်ပျိုးမြေဧက (၂၅၈၀) ဧကကို အကျိုးပြုမည် ဖြစ်သည်။

          ထိုမှတဆင့် ဒုတိယဝန်ကြီးသည် ရန်ကုန်-မန္တလေးကားလမ်းဟောင်း၏ အနောက်ဘက် (၂) မိုင်အကွာတွင် တည်ရှိသော ရွှေတန်ကျေးရွာသို့သွားရောက်၍ ပဲခူးမြို့နယ် ကျေးလက်လမ်းဖွံ့ဖြိုး ရေးဦးစီးဌာန၏ ၂၀၂၅-၂၆ ဘဏ္ဍာနှစ် ပြည်ထောင်စုအထွေထွေပိုလျှံရန်ပုံငွေဖြင့် ရွှေတန်-ပြဟန် ကျေးရွာချင်းဆက်လမ်း အရှည် (၅) ဖာလုံ ကွန်ကရစ်ခင်းခြင်းလုပ်ငန်းအား ကြည့်ရှုစစ်ဆေးပြီး အရည်အသွေးပြည့်မီစွာ အချိန်မီပြီးစီးရေး မှာကြားသည်။

          ဆက်လက်၍ ဒုတိယဝန်ကြီးသည် ဒေသခံပြည်သူများနှင့်တွေ့ဆုံ၍ နိုင်ငံတော်အစိုးရ၏ လမ်းညွှန်ချက်များနှင့်အညီ မိမိတို့ဝန်ကြီးဌာနက ဆောင်ရွက်ပေးလျက်ရှိသော ဖွံ့ဖြိုးရေးလုပ်ငန်း များ၊ မိသားစုဝင်ငွေတိုးပွားရေး၊ အလုပ်အကိုင်အခွင့်အလမ်းရရှိရေး လုပ်ငန်းဆိုင်ရာများ ရှင်းလင်း ပြောကြားပြီး ဒေသခံပြည်သူများ၏ ဖွံ့ဖြိုးရေးလုပ်ငန်းတင်ပြချက်များအပေါ် ပေါင်းစပ်ဖြည့်ဆည်း ဆောင်ရွက်ပေးခဲ့ကြောင်း သိရသည်။