09 Jan,2026

နေပြည်တော် ဇန်နဝါရီ ၉

 သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန၊ ဒုတိယဝန်ကြီး ဦးသိုက်စိုးသည် ယနေ့နံနက် ပိုင်းက အမြဲတမ်းအတွင်းဝန် ဦးခန့်ဇော်နှင့် တာဝန်ရှိသူများလိုက်ပါလျက် နေပြည်တော်ကောင်စီ နယ်မြေ၊ လယ်ဝေးမြို့နယ်၊ ကြို့ပင်သာကျေးရွာသို့ သွားရောက်၍ ငလျင်ဒဏ်ကြောင့် ထိခိုက် ပျက်စီးခဲ့သည့် ကြို့ပင်သာ-ပေါင်းလောင်း ကျေးရွာချင်းဆက်လမ်းပေါ်ရှိ စစ်တောင်းမြစ်ကူး ကွန်ကရစ်တံတား ပေ (၆၀၀) အား ဆက်သွယ်သွားလာမှု မပြတ်တောက်စေရန် ကျေးလက်လမ်း ဖွံ့ဖြိုးရေးဦးစီးဌာနက ၂၀၂၅-၂၀၂၆ ဘဏ္ဍာနှစ် ခွင့်ပြုရန်ပုံငွေဖြင့် ပြန်လည်ပြုပြင်ခဲ့မှုများနှင့် ၂၀၂၆-၂၀၂၇ ဘဏ္ဍာနှစ်တွင် ဆက်လက်ဆောင်ရွက်မည့် အခြေအနေများအား ကြည့်ရှုစစ်ဆေးရာ တာဝန် ရှိသူများက လုပ်ငန်းဆောင်ရွက်ခဲ့မှုများ ရှင်းလင်းတင်ပြကြသည်။

 တင်ပြမှုများအပေါ် ဒုတိယဝန်ကြီးက ပြုပြင်ရန်ကျန်ရှိသည်များ အမြန်ပြုပြင်နိုင်ရေး ကြိုတင် စီမံထားရန်၊ အရည်အသွေးပြည့်မီရေးအတွက် တာဝန်ရှိသူများက စဉ်ဆက်မပြတ် ကြီးကြပ် ကွပ်ကဲကြရန် မှာကြားပြီး လိုအပ်သည်များ ပေါင်းစပ်ဖြည့်ဆည်း ဆောင်ရွက်ပေးခဲ့သည်။

 ထိုမှတဆင့် ဒုတိယဝန်ကြီးသည် ရုံးပင်ကျေးရွာသို့ သွားရောက်၍ ရုံးပင်-အေးချမ်းသာ စစ်တောင်းမြစ်ကူး ကွန်ကရစ်တံတား ပေ (၈၄၀) ငလျင်ဒဏ်ထိခိုက်ပျက်စီးမှုများအား ကျေးလက် လမ်းဖွံ့ဖြိုးရေးဦးစီးဌာနက ပြန်လည်ပြုပြင်ခဲ့မှုများနှင့် ၂၀၂၆-၂၀၂၇ ဘဏ္ဍာနှစ်တွင် ဆက်လက် ဆောင်ရွက်မည့် အခြေအနေများအား ကြည့်ရှုစစ်ဆေးပြီး လိုအပ်သည်များ မှာကြားခဲ့ကြောင်း သတင်းရရှိသည်။