23 Jan,2026

တောင်ကြီး ဇန်နဝါရီ  ၂၂

            ရှမ်းပြည်နယ်(တောင်ပိုင်း)တောင်ကြီးမြို့နယ် ကျေးလက်လမ်းဖွံ့ဖြိုးရေးဦးစီးဌာနသည် ၂၀၂၅-၂၀၂၆ ဘဏ္ဍာနှစ်တွင် ပြည်နယ်(ငွေလုံးငွေရင်း)ခွင့်ပြု ရန်ပုံငွေ ကျပ် ၂၃၃ ဒသမ ၆၆၁ သန်းဖြင့် ရေပူ- ကျောက်နီ ကျေးရွာချင်းဆက်လမ်းအား မြေသားလမ်းမှ ကတ္တရာ လမ်းသို့ အဆင့်မြှင့်တင်ခြင်းလုပ်ငန်း ရာနှုန်းပြည့် ဆောင်ရွက်ပြီးစီးမှုအခြေအနေများကို ဇန်နဝါရီလ ၂၂  ရက် နံနက်ပိုင်းတွင် တာဝန်ရှိသူများက ကွင်းဆင်းစစ်ဆေးသည်။

        ထိုသို့စစ်ဆေးရာတွင် ကျေးလက်လမ်းဖွံ့ဖြိုးရေးဦးစီးဌာန(ရုံးချုပ်) စစ်ဆေးရေးအရာရှိချုပ်နှင့် တာဝန်ရှိသူများက ရေပူကျေးရွာနှင့် ကျောက်နီ ကျေးရွာတို့ကို ဆက်သွယ်ထားသော ကျေးရွာချင်းဆက်လမ်းအား မြေသားလမ်းမှ ကတ္တရာလမ်းသို့ အဆင့်မြှင့်တင်ခြင်းလုပ်ငန်းဆောင်ရွက်ပြီးစီးမှုအခြေအနေများကို ကြည့်ရှု စစ်ဆေးသည်။

            ဆက်လက်၍ စစ်ဆေးရေးအရာရှိချုပ်က တာဝန်ရှိသူများနှင့်တွေ့ဆုံကာ ကတ္တရာလမ်းအား ရေရှည်တည်တံ့အောင် ဝိုင်းဝန်းထိန်းသိမ်းကြရန် ဆွေးနွေး မှာကြားပြီး ကျေးရွာတင်ပြချက်များအပေါ် လိုအပ်သည်များကို မှာကြားသည်။

           အဆိုပါ ရေပူ- ကျောက်နီကျေးရွာချင်းဆက်လမ်း အဆင့်မြှင့်တင်ခြင်းလုပ်ငန်းသည် လမ်းအရှည် ၄ ဖာလုံ၊ အကျယ် ၁၂ပေ၊ ထု ၁၅လက်မရှိပြီး တောင်ကြီးမြို့နယ် ကျေးလက်လမ်းဖွံ့ဖြိုးရေးဦးစီးဌာနမှ အင်ဂျင်နီယာများ၏ နည်းပညာအကူအညီဖြင့် တင်ဒါအောင်မြင်သည့် ကုမ္ပဏီများမှ ဆောင်ရွက်ခဲ့ရာ ယခုအခါ လုပ်ငန်းများ အားလုံး ရာနှုန်းပြည့်ဆောင်ရွက်ပြီးစီးပြီဖြစ်ကြောင်း သိရသည်။

မောင်ခိုင်