30 Jan,2026

မိတ္ထီလာ ဇန်နဝါရီ ၃၀

မိတ္ထီလာမြို့နယ်သမဝါယမအသင်းစု(လီမိတက်)၏ ၂၀၂၄-၂၀၂၅ ဘဏ္ဍာရေးနှစ် နှစ်ပတ်လည် အရပ်ရပ်ဆိုင်ရာအစည်းအဝေးကို ဇန်နဝါရီ ၂၈ ရက် နံနက် ၁ဝ နာရီက မြို့နယ်သမဝါယမ အသင်းစု (လီမိတက်) အစည်းအဝေးခန်းမတွင် ကျင်းပခဲ့ကြောင်း သိရသည်။

အဆိုပါအစည်းအဝေးတွင် ဦးစွာမြို့နယ်သမဝါယမအသင်းစု(လီမိတက်)ဥက္ကဋ္ဌ ဦးကျော်ငြိမ်း သဘာပတိအဖြစ်ဆောင်ရွက်ပြီး အဖွင့်အမှာစကားပြောကြားသည်။ ဆက်လက်၍ မန္တလေးတိုင်း ဒေသကြီး သမဝါယမဦးစီးဌာန ညွှန်ကြားရေးမှူး ဦးထွန်းဇော်ဦးက အစည်းအဝေးကျင်းပရခြင်း၏ ရည်ရွယ်ချက်၊ သမဝါယမအသင်းဥပဒေ၊ နည်းဥပဒေညွှန်ကြားချက်များအား ရှင်းလင်းပြောကြား ပြီး တိုင်းဒေသကြီးသမဝါယမအသင်းစုချုပ်ဥက္ကဋ္ဌ ဦးထွန်းလှိုင်နှင့် မြို့နယ်သမဝါယမဦးစီးဌာန ဦးစီးအရာရှိ ဦးမြင့်လွင်တို့က အသီးသီးလမ်းညွှန်အမှာစကားပြောကြားသည်။ မြို့နယ်သမဝါယမ အသင်းစု(လီမိတက်) ၂၀၂၄-၂၀၂၅ ဘဏ္ဍာရေးနှစ်အတွက် လုပ်ငန်းအစီရင်ခံစာ ဘဏ္ဍာရေး ရှင်းတမ်းများအား အတွင်းရေးမှူးကလည်းကောင်း၊ အသင်းစာရင်းစစ်အစီရင်ခံစာကို အသင်း စာရင်းစစ်အဖွဲ့ ခေါင်းဆောင်ကလည်းကောင်း ဖတ်ကြားတင်သွင်းသည်။ ၎င်းနောက် ရှေ့လုပ်ငန်းစဉ်နှင့် ဆွေးနွေးချက်များအား ဆုံးဖြတ်အတည်ပြုရန်အမှုဆောင်က ရှင်းလင်းတင်ပြ ခဲ့ကြပြီး တက်ရောက်လာသော အသင်းဝင်ကိုယ်စားလှယ်များက ကန့်ကွက်ရန်မရှိ အတည်ပြု ဆုံးဖြတ်ခဲ့ကြောင်း သိရသည်။

ချမ်းသာ

မန္တလေးတိုင်းဒေသကြီး