18 Feb,2026

ရေဖြူမြို့နယ် ရေပုံးကျေးရွာ၌ စိမ့်စမ်းရေပိုက်လိုင်းသွယ်တန်းခြင်းလုပ်ငန်းဆောင်ရွက်ပြီးစီးမှုစစ်ဆေး

‎==================================

‎ရေဖြူ         ဖေဖော်ဝါရီ       ၁၈

‎‎တနင်္သာရီတိုင်းဒေသကြီး၊ ထားဝယ်ခရိုင်၊ ရေဖြူမြိူ့နယ် ကျေးလက်ဒေသဖွံ့ဖြိုးတိုးတက်ရေးဦးစီး ဌာနက ရေပုံးကျေးရွာ၌ တိုင်းဒေသကြီးရန်ပုံငွေဖြင့် စိမ့်စမ်းရေပိုက်လိုင်းသွယ်တန်းခြင်းလုပ်ငန်း ဆောင်ရွက်ပြီးစီးမှု အခြေအနေများကို တာဝန်ရှိသူများမှ ယနေ့နံနက်ပိုင်းအချိန်က ကွင်းဆင်းစစ်ဆေး ကြကြောင်းသိရသည်။

‎‎ထိုသို့ကွင်းဆင်းစစ်ဆေးရာ ရေဖြူမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ မြို့နယ်ဦးစီးမှူး ဒေါ်စန္ဒာမြင့်နှင့် ဝန်ထမ်းများက ကျေးရွာသောက်သုံးရေရရှိရေးကော်မတီဝင်များနှင့် အတူ ရေပုံးကျေးရွာ၌ စိမ့်စမ်းရေပိုက်လိုင်းသွယ်တန်းခြင်းနှင့် အိမ်တိုင်ရာရောက်ရေမီတာတပ်ဆင်ခြင်း လုပ်ငန်းများ ဆောင်ရွက်ပြီးစီးမှုအခြေအနေများကို ကြည့်ရှု့စစ်ဆေးကြပြီး မြို့နယ်ဦးစီးမှူးက ရေကော်မတီဝင်များအား ဆောင်ရွက်ပြီးလုပ်ငန်းများ ရေရှည်အသုံးပြုနိုင်ရေးနှင့် တစ်နှစ်ပတ်လုံး သောက်သုံးရေဖူလုံစေရေး စနစ်တကျသုံးစွဲကြရန် မှာကြားပြီး လိုအပ်သည်များ ပေါင်းစပ်ညှိနှိုင်း ဆောင်ရွက်ခဲ့ကြောင်း သိရသည်။

‎‎ရေဖြူမြို့နယ် ရေပုံးကျေးရွာ၌ အရှည် ၃ မိုင် ၄ ဖာလုံ ရှိသော စိမ့်စမ်းရေပိုက်လိုင်းသွယ်တန်းခြင်းနှင့် အိမ်တိုင်ရာရောက်ရေမီတာတပ်ဆင်ခြင်းလုပ်ငန်းများကို ၂၀၂၄-၂၀၂၅ ဘဏ္ဍာရေးနှစ် တိုင်းဒေသကြီး ရန်ပုံငွေကျပ် ၇၃ ဒဿမ ၃၇ သန်းနှင့် ပြည်သူပူးပေါင်းပါဝင်မှုများဖြင့် ဆောင်ရွက်ခဲ့ခြင်းဖြစ်ကြောင်း၊ အဆိုပါရေရရှိရေးလုပ်ငန်းများဆောင်ရွက်ခြင်းကြောင့် ကျေးရွာသူ/သားများ သောက်သုံးရေ လုံလောက်စွာရရှိသည့်အပြင် အိမ်တိုင်ရာရောက်စနစ်ဖြစ်၍ ရေခပ်ရန်အချိန်ကုန်သက်သာခြင်း၊ လူနေမှုအဆင့်အတန်းမြင့်မားလာခြင်း စသည်အကျိုးကျေးဇူးများစွာရရှိကြောင်း ရေဖြူမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ သိရသည်။