19 Mar,2026

ကျွန်းစု မတ် ၁၈

           တနင်္သာရီတိုင်းဒေသကြီး ကျွန်းစုမြို့နယ်၌ ပထော် - ပထက်ကျေးရွာချင်းဆက်တံတား တည်ဆောက်ပြီးစီးမှုနှင့် ပထော်ကျေးရွာ မြေသားလမ်းကို ကွန်ကရစ်လမ်း ဆောင်ရွက်ပေးနိုင်ရန်အတွက် ကျေးလက်လမ်းဖွံ့ဖြိုးရေးဦးစီးဌာန(ရုံးချုပ်)မှ အင်ဂျင်နီယာချုပ် ဦးထွန်းဝေ၊ တိုင်းဒေသကြီး ညွှန်ကြားရေးမှူး(မြို့ပြ)နှင့် တာဝန်ရှိသူများသည် ယမန်နေ့က ကွင်းဆင်းကြည့်ရှုစစ်ဆေးကြသည်။

         ဦးစွာ ကျေးရွာဓမ္မာရုံ၌ ရပ်မိရပ်ဖများနှင့် တွေ့ဆုံရာတွင် အင်ဂျင်နီယာချုပ်က ကျေးလက်နေပြည်သူများ လူမှုစီးပွားဘဝဖွံ့ဖြိုးတိုးတက်ရေးအတွက် ကျေးလက်လမ်းဖွံ့ဖြိုးရေးဦးစီးဌာနမှ လမ်း/တံတားလုပ်ငန်းများကို ဆောင်ရွက်ပေးလျက်ရှိကြောင်း ပြောကြားပြီး ကျေးရွာပတ်လမ်း မြေသားလမ်းကို ကွန်ကရစ်လမ်းအဖြစ် ဆောင်ရွက်ပေးနိုင်ရေး သွားရောက်ကြည့်ရှုစစ်ဆေးသည်။

          ဆက်လက်၍ ဆောင်ရွက်ပြီးစီးခဲ့သည့် ပထော်-ပထက် ကျေးရွာချင်းဆက်လမ်းပေါ်ရှိ ကျောက်ကြီးစီ သံကူကွန်ကရစ်တံတားနှင့် တံတားချဉ်းကပ်လမ်း ပြင်ဆင်ထိန်းသိမ်းခြင်းလုပ်ငန်း တည်ဆောက်နေမှုကို ကြည့်ရှုစစ်ဆေးခဲ့ကြောင်း သိရသည်။

ခိုင်ထူး (ပြန်/ဆက်)