18 May,2026

သာစည် မေ ၁၈

မန္တလေးတိုင်းဒေသကြီး၊ သာစည်မြို့နယ်၌ ရက်(၁၀၀)စီမံချက်ဖြင့် ကုက္ကိုကန်ကျေးရွာ ရွှေကန်မြေ စိုက်ပျိုးထုတ်လုပ် ရေးသမဝါယမအသင်းက စိုက်ပျိုးထားသော နွေစပါးများ ပန်းတိုင်အထွက်နှုန်းရရှိရေး တာဝန်ရှိသူများ ကွင်းဆင်းကြည့်ရှုပြီး အသိပညာပေးခြင်းများ ဆောင်ရွက်ခဲ့ကြောင်း သိရသည်။  

ကွင်းဆင်းကြည့်ရှုရာတွင် ဦးစွာ တိုင်းဒေသကြီးသမဝါယမဦးစီးဌာနမှ လက်ထောက်ညွှန်ကြားရေးမှူး ဦးလှိုင်မိုး၊ မြို့နယ်သမဝါယမဦးစီးဌာနမှ ဦးစီးအရာရှိ ဦးညီညီဝင်းနှင့် တာဝန်ရှိသူများ၊ မြို့နယ်စိုက်ပျိုးရေးဦးစီးဌာနမှ တာဝန်ရှိသူများက သမဝါယမ အသင်းသားတောင်သူများနှင့်တွေ့ဆုံပြီး လက်ထောက်ညွှန်ကြားရေးမှူးက အမှာစကား ပြောကြားသည်။ ဆက်လက်ပြီး မြို့နယ်စိုက်ပျိုးရေး ဦးစီးဌာနမှ ဒုတိယဦးစီးမှူး ဦးအောင်ကျော်စိုးက စိုက်ပျိုးရေးနည်း ပညာများနှင့်ပတ်သက်၍ အသိပညာပေး ပြောကြားသည်။ ထို့နောက် နွေစပါးစိုက်ခင်းအခြေအနေများကို ကွင်းဆင်းကြည့်ရှုပြီး လက်ထောက်ညွှန်ကြားရေးမှူးက ပန်းတိုင်အထွက်နှုန်းရရှိစေရန် လိုအပ်သည်များကို စိုက်ပျိုးရေးဦးစီးဌာန တာဝန်ရှိသူများထံက နည်းပညာများရယူပြီး ဆောင်ရွက်သွားကြရန် မှာကြားခဲ့ကြောင်း သိရသည်။

အဆိုပါ ရွှေကန်မြေ စိုက်ပျိုးထုတ်လုပ်ရေးသမဝါယမအသင်းမှ အသင်းသားတောင်သူ ၇၅ ဦးက နွေစပါးဧက ၃၀၀ စိုက်ပျိုးထားကြောင်း မြို့နယ်သမဝါယမဦးစီးဌာနမှ သိရသည်။

မြို့နယ်(ပြန်/ဆက်)

မန္တလေးတိုင်းဒေသကြီး