22 May,2026

ရက် ၁၀၀ စီမံချက်ဖြင့် သာစည်မြို့နယ်၌ အသက်မွေးဝမ်း ကျောင်း အထောက်အကူပြု ယိုးဒယားကြိုးများဖြင့် လူသုံးကုန်ထုတ်လုပ်နည်း (ခြင်းတောင်း) သင်တန်းဖွင့်

သာစည်  ၂၀၂၆ မေလ  ၂၂ ရက်

      သမဝါယမနှင့်ကျေးလက်ဖွံ့ဖြိုးရေးဝန်ကြီးဌာန ၊ မန္တလေးတိုင်း ဒေသကြီး မိတ္ထီလာခရိုင် သာစည်မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီး ဌာနက ကျေးလက်နေပြည်သူများ အလုပ်အကိုင်အခွင့်အလမ်းများရရှိစေရန်၊ ဝင်ငွေတိုးလုပ်ငန်းများ ပိုမိုတွင်ကျယ်စွာလုပ်ကိုင်လာနိုင်စေရန် နှင့် ကျွမ်းကျင် လုပ်သားများပေါ်ပေါက်စေရန် ရည်ရွယ်၍ ၂၀၂၆ -၂၀၂၇ ခု ဘဏ္ဍာနှစ် ရက် ၁၀၀ စီမံချက်ဖြင့် အသက်မွေး ဝမ်းကျောင်းအထောက်အကူပြု ယိုးဒယားကြိုးများဖြင့် လူသုံးကုန် ထုတ်လုပ်နည်း ( ခြင်းတောင်း ) သင်တန်း မေလ ၂၀ ရက်နေ့ နံနက်ပိုင်းကဖွင့်လှစ်ခဲ့ကြောင်း သိရသည်။

     ထိုသို့ ဖွင့်လှစ်ရာတွင် မြို့နယ်စီမံခန့်ခွဲရေးနှင့် အုပ်ချုပ်ရေး ကော်မတီဥက္ကဌ၊ ဦးမျိုးသက်ကျော်မှ အဖွင့်အမှာစကားပြောကြားကာ သာစည်မြို့နယ် ကျေးလက် ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဒေါ်မြသက်ဝင်းက သင်တန်းသူများအနေဖြင့် သင်တန်းမှ ပို့ချသော ပညာရပ်များကို စနစ်တကျ သင်ယူစေလိုကြောင်း၊ လက်တွေ့နယ်ပယ် တွင်လည်း အသုံးချစေလိုကြောင်း၊ တစ်နိုင်တစ်ပိုင် မှသည် အသေးစား၊အငယ်စား၊ အလတ်စား စီးပွားရေးလုပ်ကိုင်သည်အထိ ကြိုးစား ဆောင်ရွက်စေလိုကြောင်း မှာကြားခဲ့ကြောင်း သိရသည်။

     ထို့နောက် မြို့နယ်စီမံခန့်ခွဲရေးနှင့် အုပ်ချုပ်ရေး ကော်မတီဥက္ကဌ၊ ဦးမျိုးသက်ကျော်နှင့် သာစည်မြို့နယ် ကျေးလက် ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဒေါ်မြသက်ဝင်းတို့က သင်တန်းတက်ရောက်မည့် သင်တန်းသူများထံ သင်ထောက်ကူပစ္စည်းများ ပေးအပ်ခဲ့သည်။

    အဆိုပါ သင်တန်းသို့မြစိမ်းရောင်စီမံကိန်းဝင်ကျေးရွာ၆ရွာမှ သင်တန်းသူ ၂၀ ဦး တက်ရောက်ကြပြီးသင်တန်းတွင်လိုအပ်သောသင်ထောက်ကူပစ္စည်းများထောက်ပံ့ပေးပြီး ယိုးဒယားကြိုးများဖြင့် လူသုံးကုန်ပစ္စည်းထုတ်လုပ်နည်း (ခြင်းတောင်း) သင်တန်း ကို မေ ၂၀ ရက်ကနေ မေလ၂၉ ရက်ထိ ၁၀ ရက်ကြာ စာတွေ့လက်တွေ့ဖြင့် အခမဲ့ သင်ကြားပို့ချလျက်ရှိကြောင်း သာစည်မြို့နယ် ကျေးလက်ဒေသဖွံ့ဖြိုးတိုးတက်ရေး ဦးစီးဌာန မြို့နယ်ဦးစီးမှူးဒေါ်မြသက်ဝင်းထံမှ သိရသည်။