09 Jun,2026

နေပြည်တော် ဇွန် ၈

သမဝါယမဦးစီးဌာနတွင် တာဝန်ထမ်းဆောင်ကြမည့် ဝန်ထမ်းများအား စာရင်းရေး စာရင်းကိုင်၊ စာရင်းစစ်လုပ်ငန်းများ တတ်ကျွမ်းစေရန်နှင့် သမဝါယမကဏ္ဍမှ အကောင်အထည် ဖော် ဆောင်ရွက်လျက်ရှိသော စီမံကိန်းလုပ်ငန်းများအား သိရှိဆောင်ရွက်တတ်စေရန် ရည်ရွယ်၍ ရုံးလုပ်ငန်းနှင့် အခြေခံစာရင်းရေး စာရင်းကိုင်၊ စာရင်းစစ်ကျွမ်းကျင်မှုသင်တန်း(၁/၂၀၂၆)ကို သမဝါယမဦးစီးဌာန၊ ညွှန်ကြားရေးမှူးချုပ်ရုံးတွင် (၈-၆-၂၀၂၆)ရက်နေ့မှ (၁၂-၆-၂၀၂၆)ရက်နေ့ထိ ဖွင့်လှစ်လျက်ရှိရာ အဆိုပါသင်တန်းသို့ ပြည်ထောင်စုတိုင်းရင်းသားလူငယ်များ စွမ်းရည်ဖွံ့ဖြိုးရေး ဒီဂရီကောလိပ် ကျောင်းဆင်းမောင်မယ်(၂၀)ဦး၊ သမဝါယမဦးစီးဌာန၊ ညွှန်ကြားရေးမှူးချုပ်ရုံးမှ အငယ်တန်းစာရေး(၁၅)ဦး၊ တိုင်းဒေသကြီး/ပြည်နယ် သမဝါယမဦးစီးဌာနအဆင့်ဆင့်မှ အငယ်တန်း စာရေး (၁၅၀)ဦး စုစုပေါင်း (၁၈၅)ဦး တက်ရောက်ကြသည်။

ထိုသင်တန်းတွင် အခြေခံစာရင်းရေး စာရင်းကိုင်ဘာသာရပ်၊ စာရင်းစစ်ဆေးခြင်း ဘာသာရပ်များအပြင် နိုင်ငံတော်သမ္မတ၏လမ်းညွှန်ချက်များနှင့် သမဝါယမကဏ္ဍမှ ဆောင်ရွက် လျက်ရှိသည့် ကုန်ထုတ်လုပ်မှု၊ ကုန်သွယ်မှု၊ ဝန်ဆောင်မှု လုပ်ငန်းများနှင့်ပတ်သက်၍ သက်ဆိုင်ရာ ဌာနခွဲများမှ ညွှန်ကြားရေးမှူးများက  ရှင်းလင်းဆွေးနွေး ပို့ချပေးသွားမည်ဖြစ်ကြောင်း သိရသည်။