18 Jun,2026

မိုင်းဖြတ် မြို့နယ်၌ အသက်မွေးဝမ်းကျောင်းအထောက်အကူပြု ပန်းရံသင်တန်းဆင်းပွဲကျင်းပ

မိုင်းဖြတ်    ဇွန်    ၁၈

        သမဝါယမနှင့် ကျေးလက်ဖွံ့ဖြိုးရေးဝန်ကြီးဌာန  ရှမ်းပြည်နယ်(အရှေ့ပိုင်း) တာချီလိတ်ခရိုင် မိုင်းဖြတ်မြို့နယ်ကျေးလက်ဒေသဖွံ့ဖြိုးတိုးတက်ရေး ဦးစီးဌာနက  ကျေးလက်နေပြည်သူများ အလုပ်အကိုင်အခွင့်အလမ်း များရရှိစေရန်၊ဝင်ငွေတိုးလုပ်ငန်းများ ပိုမိုတွင်ကျယ်စွာ လုပ်ကိုင်လာနိုင်စေရန်၊လုပ်ငန်းစွမ်းရည် ဖွံ့ဖြိုးတိုးတက်စေရန်နှင့် ကျွမ်းကျင်လုပ်သားများပေါ်ပေါက်စေရန် ရည်ရွယ်၍ အသက်မွေးဝမ်းကျောင်းအထောက် အကူပြု ပန်းရံသင်တန်း ဆင်းပွဲ အခမ်းအနားကို ဇွန်လ  ၁၇ ရက်နေ့  နံနက် ၁၀ နာရီက နမ့်လန်းကျေးရွာခန်မဆောင် ၌ကျင်းပပြုလုပ်ခဲ့ကြောင်းသိရသည်။
          ရှေးဦးစွာ  မိုင်းဖြတ်မြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဒေါ်ခင်မေလွင် က သင်တန်းဆင်း အမှာစကားပြောကြားပြီး သင်တန်းသားများအနေဖြင့် သင်တန်းမှသင်ခန်းစာများကို လက်တွေ့အသုံးချပြီး တစ်ဖက် တစ်လမ်းမှ မိသားစုဝင်ငွေရရှိနိုင်သည်အထိ ဆောင်ရွက်ကြရန် မှာကြားကာ သင်တန်းသားများကို သင်တန်းဆင်းလက်မှတ်များ ပေးအပ်ခဲ့သည်။
         
        အဆိုပါ သင်တန်းဆင်းပွဲသို့ မြို့နယ်ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ ဝန်ထမ်းများနှင့်မိုင်းဖြတ်မြို့နယ်အတွင်းရှိ ကျေးရွာ ၄ ရွာမှ သင်တန်းသား ဦးရေ ၂၀ တက်ရောက်ကြကာ သင်တန်းကာလမှာ ဇွန် ၃ ရက်မှ ၁၇ရက်နေ့ထိ ၁၅ရက်ကြာ စာတွေ့ လက်တွေ့သင်ကြား ပို့ချပေးခဲ့ကြောင်း သိရသည်။