26 Jun,2026

ကျွန်းစုမြို့နယ် ကမ်းကြီးကျေးရွာ၌ အခြေခံအပ်ချုပ်စက်သင်တန်းဆင်းပွဲ ကျင်းပပြုလုပ်

‎************************************************************************

‎ကျွန်းစု         ဇွန်         ၂၅

‎‎တနင်္သာရီတိုင်းဒေသကြီး၊ မြိတ်ခရိုင်၊ ကျွန်းစုမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနက ကျေးလက်နေအမျိုးသမီးငယ်များ အလုပ်အကိုင်အခွင့်အလမ်းရရှိစေရန်အတွက် ကမ်းကြီးကျေးရွာ၌ ဖွင့်လှစ်ခဲ့သည့် အသက်မွေးဝမ်းကျောင်းအထောက်အကူပြု အခြေခံအပ်ချုပ်စက်သင်တန်းဆင်းပွဲ အခမ်းအနားကို ဇွန် ၂၅ ရက်နေ့က အဆိုပါကျေးရွာစုပေါင်းခန်းမ၌ ကျင်းပပြုလုပ်ခဲ့ကြောင်း သိရသည်။

‎‎ရှေးဦးစွာ ကျွန်းစုမြို့နယ် စီမံခန့်ခွဲရေးနှင့်အုပ်ချုပ်ရေးကော်မတီ ဥက္ကဌ ဦးအောင်စန်းဝင်းက အဖွင့်အမှာစကားပြောကြားပြီး ကျွန်းစုမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာန မြို့နယ်ဦးစီးမှူး ဒေါ်နှင်းသန္တာက သင်တန်းဖွင့်လှစ်ပေးရခြင်း၏ ရည်ရွယ်ချက်၊ အကျိုးကျေးဇူးများနှင့် သင်တန်းဖွင့်လှစ်ခဲ့မှု အခြေအနေများကို ရှင်းလင်းပြောကြားသည်။

‎‎ထို့နောက် စီမံခန့်ခွဲရေးနှင့်အုပ်ချုပ်ရေးကော်မတီ ဥက္ကဌနှင့် တာဝန်ရှိသူများက သင်တန်းသူများအား သင်တန်းဆင်းလက်မှတ်များ ပေးအပ်ချီးမြှင့်ပြီး စုပေါင်းမှတ်တမ်းတင်ဓာတ်ပုံရိုက်ကူးခဲ့ကြောင်း သိရသည်။

‎‎အဆိုပါသင်တန်းတွင် ကျွမ်းကျင်နည်းပြဆရာမများက စက်ချုပ်ခြင်းဆိုင်ရာ အခြေခံအတတ်ပညာများ ကို သင်ထောက်ကူပစ္စည်းစုံလင်စွာဖြင့် မေလ ၁၂ ရက်နေ့မှ ဇွန်လ ၂၅ ရက်နေ့အထိ သင်တန်းကာလ ၄၅ ရက်ကြာ စာတွေ့လက်တွေ့ အခမဲ့သင်ကြားပို့ခဲ့ခြင်းဖြစ်ပြီး ကျွန်းစုမြို့နယ်အတွင်းရှိ ကမ်းကြီးကျေးရွာ နှင့် ပတ်ဝန်းကျင်ကျေးရွာများမှ သင်တန်းသူ ၂၀ ဦး တက်ရောက်သင်ယူခဲ့ကြောင်း ကျွန်းစုမြို့နယ် ကျေးလက်ဒေသဖွံ့ဖြိုးတိုးတက်ရေးဦးစီးဌာနမှ သိရသည်။