29 Jun,2026

သာစည် ဇွန် ၂၈

           မန္တလေးတိုင်းဒေသကြီး မိတ္ထီလာခရိုင် သာစည်မြို့နယ်ကျေးလက်လမ်းဖွံ့ဖြိုးရေးဦးစီးဌာနက နှမ်းကန်ကျေးရွာလမ်းကျောက်ချောခင်းခြင်း လုပ်ငန်း ဆောင်ရွက်နေမှု အခြေအနေများကို ယနေ့ နံနက်ပိုင်းက တာဝန်ရှိသူများ ကွင်းဆင်းခဲ့ကြောင်း သိရသည်။

         ထိုသို့ ကွင်းဆင်းစစ်ဆေးရာတွင် သာစည်မြို့နယ် ကျေးလက်လမ်းဖွံ့ဖြိုးရေးဦးစီးဌာန မြို့နယ်ဦးစီးမှူး ဒေါ်မြသက်မွန်နှင့် အင်ဂျင်နီယာဝန်ထမ်းများက နှမ်းကန်ကျေးရွာလမ်း ကျောက်ချောခင်းခြင်းလုပ်ငန်း ဆောင်ရွက်နေမှု အခြေအနေများကို ကြည့်ရှုစစ်ဆေးပြီး သာစည်မြို့နယ်ကျေးလက်လမ်းဖွံ့ဖြိုး‌ရေးဦးစီးဌာန မြို့နယ်ဦးစီးမှူး ဒေါ်မြသက်မွန်က တာဝန်ရှိသူများကို လုပ်ငန်းများ သတ်မှတ်စံချိန်စံညွန်းမီ အချိန်မီပြီးစီးအောင် ဆောင်ရွက်ကြရန် လိုအပ်သည်များ ဆွေးနွေးညှိနှိုင်း မှာကြားခဲ့သည်။

            အဆိုပါ နှမ်းကန်ကျေးရွာလမ်း ကျောက်ချောခင်းခြင်းလုပ်ငန်းကို ၂၀၂၆-၂၀၂၇ ဘဏ္ဍာနှစ်တွင် သာစည်မြို့နယ် ကျေးလက်လမ်းဖွံ့ဖြိုးရေးဦးစီးဌာနက တိုင်းဒေသကြီး ငွေလုံးငွေရင်း ခွင့်ပြုရန်ပုံငွေ ကျပ် ၆၃ ဒသမ ၅၇၁ သန်းဖြင့် လမ်းအရှည် ၁ ဒသမ ၇ ဖာလုံ၊ အကျယ် ၁၆ ပေ၊ အမြင့် ခြောက်လက်မရှိ ကျောက်ချောခင်းခြင်းလုပ်ငန်းကို ဇွန်လ ပထမပတ်မှ စတင်၍ လုပ်ငန်းများဆောင်ရွက်လျက်ရှိရာ ယခုအခါ လုပ်ငန်းများ ၆၀ ရာခိုင်နှုန်း ဆောင်ရွက်ပြီးစီးပြီ ဖြစ်ကြောင်း သိရသည်။

ဟိန်းထက်စိုး(မလှိုင်)