30 Jul,2026

သမဝါယမနှင့်စီမံခန့်ခွဲမှုပညာတက္ကသိုလ်(စစ်ကိုင်း)တွင် ၂၀၂၅-၂၀၂၆ ပညာသင်နှစ် မိုးရာသီ အားကစားပြိုင်ပွဲ ဖွင့်ပွဲအခမ်းအနားကို တက္ကသိုလ်ဘောလုံးကွင်း၌ (၂၇.၇.၂၀၂၆)၊ ညနေ(၃း၃၀)နာရီ အချိန်တွင် ကျင်းပပြုလုပ်ခဲ့ပါသည်။

အခမ်းအနားတွင် သမဝါယမနှင့်စီမံခန့်ခွဲမှုပညာတက္ကသိုလ်(စစ်ကိုင်း) ပါမောက္ခချုပ် ၊ ဒုတိယပါမောက္ခချုပ်များ၊ စီမံခန့်ခွဲရေးရာဌာနများဖြစ်သည့် စီမံခန့်ခွဲရေးဌာန၊ သင်တန်းရေး ရာဌာန၊ သုတေသနနှင့်ဖွံ့ဖြိုးမှုဌာနတို့မှ ဌာနမှူးများ၊ သင်ကြားရေး(၁၁)ဌာနမှ ပါမောက္ခ ဌာနမှူးများ၊ တွဲဖက်ပါမောက္ခ(ဌာနမှူး)၊ ဆရာ၊ဆရာမများ၊ အားကစားသမားများနှင့် ကျောင်းသား၊ ကျောင်းသူများ စုံစုံညီညီ တက်ရောက်ခဲ့ပါသည်။

အခမ်းအနားတွင် အလံကိုင်အဖွဲ့ ဦးဆောင်ပြီး ပြိုင်ပွဲဝင်အားကစားသမားများ ကွင်းအတွင်း နေရာယူပြီးသည့်နောက် ပါမောက္ခချုပ်မှ အဖွင့်အမှာစကားပြောကြားရာတွင် “တက္ကသိုလ်အနေဖြင့် ကျောင်းသား/ကျောင်းသူများ လိမ္မာပျော်ရွှင် ပညာထူးချွန်စေရန် အတွက် အားကစားပြိုင်ပွဲများ ကျင်းပရခြင်းဖြစ်ကြောင်း၊ ယခုမိုးရာသီအားကစားပြိုင်ပွဲများ ကျင်းပရခြင်းဖြင့် ကျောင်းသား/သူများအတွက် ကိုယ်လက်ကြံ့ခိုင်ဖွံ့ဖြိုးမှုရှိလာခြင်း၊ အသင်းအဖွဲ့(Team Work)အလိုက် လှုပ်ရှားဆောင်ရွက်တတ်သော အ‌လေ့အကျင့်ရရှိလာခြင်း၊ စွမ်းဆောင်ရည်များ ဖော်ထုတ်ပေးပြီး အားကစားစိတ်ဓာတ်များ မြင့်မားလာခြင်း၊ လိမ္မာရေး ခြားမှုရှိပြီး အချင်းချင်း ခင်မင်ရင်နှီးစည်းလုံးညီညွှတ်မှုတွေ ရရှိလာခြင်း၊ ကျန်းမာ ပျော်ရွှင်၍ ပညာထူးချွန်မှုရှိလာစေခြင်းတို့ ရှိလာနိုင်မည်ဖြစ်ကြောင်း၊ ပါဝင်ယှဉ်ပြိုင်ကြမည့် ကျောင်းသား/ကျောင်းသူများအနေဖြင့် “အနိုင်ရရှိရေးထက် ပါဝင်ယှဉ်ပြိုင်ခြင်းက ပို၍ အရေးကြီးသည်” ဆိုသည့် အားကစားစိတ်ဓာတ်ကို လက်ကိုင်ထား၍ စည်းကမ်းရှိစွာ၊ တရားမျှတစွာ လေးစားမှုဖြင့် ယှဉ်ပြိုင်ကြစေလိုကြောင်း၊ ကျောင်းသား/ကျောင်းသူများအနေဖြင့် အားကစားတွင်သာမက ဘက်စုံကျွမ်းကျင်ပြီး အဆင့်မြင့်ပညာများကို ကြိုးစားသင်ယူရင်း အနာဂတ်တွင် အားထားရသော ဗလငါးတန်နှင့် ပြည့်စုံသော လူတော်လူကောင်းများ ဖြစ်ကြပါ‌စေ၊ မိုးရာသီ အားကစားပွဲမှတဆင့် ကျောင်းသား/ကျောင်းသူများအကြား ချစ်ကြည်ရင်းနှီးမှု၊ စည်းလုံး ညီညွှတ်မှုဖြင့် အားကစားစိတ်ဓာတ်များ ပိုမိုခိုင်မာလာပြီး တက္ကသိုလ်၏ ဂုဏ်သိက္ခာကို မြှင့်တင်ပေးနိုင်ကြပါစေကြောင်း ဆုမွန်ကောင်းတောင်းရင်း ပြောကြားခဲ့ပါသည်။

ထို့နောက် အားကစားသမားများမှ အားကစားသံဓိဌာန်များ ရွတ်ဆိုခဲ့ပြီးနောက် ကွင်းအတွင်းမှ စနစ်တကျထွက်ခွာခဲ့ပြီး ဖွင့်ပွဲအခမ်းအနား အောင်မြင်စွာ ပြီးမြောက်ခဲ့ပါသည်။

ယခုမိုးရာသီအားကစားပြိုင်ပွဲတွင် အမျိုးသားပိုက်ကျော်ခြင်းပြိုင်ပွဲတွင် (၆)သင်းနှင့် အမျိုးသားဘောလီဘောပြိုင်ပွဲတွင် (၆)သင်း ပါဝင်ယှဉ်ပြိုင်မည်ဖြစ်ပြီး ပြိုင်ပွဲကာလကို (၂၇.၇.၂၀၂၆)ရက်နေ့မှ (၃.၈.၂၀၂၆)ရက်နေ့အထိ ကျင်းပသွားမည်ဖြစ်ကြောင်း သိရှိရသည်။